"الباز": أتمنى مراجعة قرار غلق المحال "مش عشان نحل مشكلة نعمل غيرها"
تحدث الإعلامي الدكتور محمد الباز، رئيس مجلسي إدارة وتحرير جريدة "الدستور"، عن دور المواطنين، وهم العنصر الأهم في المعادلة، مرددا: "ولأن الأزمة تقع عليهم، وقطع الكهرباء بيعمل مشكلة وأزمة كبيرة، إنت مش بس مش بتلاقي المشكلة، بتلاقي اللي يشعلل في المشكلة، فبيكون الإحساس بيها مضاعف".
وأضاف "الباز"، خلال تقديم برنامج "مش حسبة برمة" عبر إذاعة "نغم إف إم": "الشعور بالمشكلة أكبر من المشكلة ذاتها، وإحنا بقالنا سنين بنتكلم عن الجزئية دي، مصر بعد 2014 المفروض تتغير إزاي".
وتابع: "زمان كان فيه نظام إن الدولة تعمل للمواطن كل حاجة وهو مالوش علاقة، وكانت الأمور ماشية وكأنه بعقد اجتماعي، والكلام ده فضل من ثورة الضباط الأحرار لغاية 2013، ولكن بعد 30 يونيو، الناس طلعت وقررت التغيير، ودعمتها القوات المسلحة، بمعنى أن القيادة الموجودة فعلت عقدا اجتماعيا جديدا قائما على الدور المشترك بينهما".
وواصل: "كان فيه قرار بالفطام في 30 يونيو، وإن المواطن قرر إنه هيشارك القيادة في المسئولية، وكان الهتاف حينها: انزل يا سيسي مرسي مش رئيسي، ولكن الوعي بالشراكة يوجد به بعض المشكلات"، مشيرا إلى أن رئيس الوزراء، الدكتور مصطفى مدبولي، أكد منذ بضعة أشهر وقال لو إحنا وافقنا بتوفير وترشيد الكهرباء بنسبة 15% مكنش هيبقى فيه اضطرار لقطع الكهرباء لمدة يومين.
واستطرد: "دلوقتي الدكتور مصطفى مدبولي اتكلم عن غلق المحال التجارية الساعة 10 مساء، وأتمنى إنه يتم مراجعة هذا القرار، لأنه مبني على أرزاق الناس، ومش عشان نحل مشكلة نعمل مشكلة جديدة".
وعن دور المجتمع المدني، لفت إلى أن مؤسسة "حياة كريمة" أطلقت مبادرة ترشيد استهلاك الكهرباء ليس لتقليل الفاتورة ولكن لتخفيف وتقليل مدة تخفيف الأحمال.
وذكر: "لما ييجي المواطن يقولي ما أنا مقطوعة عندي أرشد إيه تاني؟، وله كل الحق والاحترام، ولكن خلينا نقول إنه ما لا يدرك كله لا يترك كله.. الترشيد هنا في باقي ساعات اليوم، ولكن الناس ترفض الترشيد لمجرد إن الكهرباء بتتقطع، مع إننا لو رشدنا باقي الساعات هنوصل إنها مش هتتقطع خالص".
وأوضح أن الحكومة عليها مراجعة إجراءاتها، وأن تكون على قدر معاناة وشكوى الناس، مثنيا على ما قامت به "المتحدة" بإعلانها المشاركة في المبادرة في كافة مؤسساتها، لأن الترشيد أصبح لزاما دون تعالٍ أو تحامل على الناس، ولا بد أن يكون هناك إيجابية في التعاطي مع المشكلة.
