أميرة سيد مكاوى تشيد بدور منى زكى في "تحت الوصاية": "اختياراتها مدروسة"
أشادت أميرة سيد مكاوى بدور الفنانة منى زكى فى مسلسل تحت الوصاية قائلة: “كبرت عمرًا وكبرت في شغلانتها وبقى شغلها علامة جودة اختياراتها للمواضيع اللي بتدخل بيها بيوت الناس اختيارات مدروسة وليها هدف، في تحت الوصاية”.
وقالت أميرة في منشور عبر صفحتها على "فيس بوك": “بتتكلم عن العاديين وبتشخص العاديين، وبتحكي عن موضوع شديد الخطورة بنعومة وبمنتهى الصدق والإخلاص، وبتقدم لشغلها مجهود حقيقي، تصوير على مركب وده مجهود مش قليل، وانتقال لمحافظة تانية، لا اهتمت بشكل ولا بلبس قد ما اهتمت بالشخصية اللي بتقدمها، وردت على كل من شكك في رسالة المسلسل بالشغل”.
واستكملت: “أنت عارف أن منى زكي بحجم موهبتها ونجوميتها لسه بتتعلم وبتسافر علشان تاخد كورس تمثيل لفلان، وتحضر ورشة لعلان، وتشتغل على الدور مع فلان؟ لا قالت استكفيت، ولا خلاص أنا نجمة محدش يقدر يقول ان ناقصني شيء فمافيش داعي للتعليم الزيادة ولا الحسوكة وللأمانة ما هو كله هينجح، ودي نقطة تضاف ليها ونادرة جدا في وسط بيتقال فيه للكل انت عظيم وتخليهم يتصوروا انهم وصلوا لنهاية التفوق رغم أنها مش كده”.
واختتمت منشورها قائلة: “منى متفوقة لأنها محترفة أولا وبتحترم شغلتها وبتبذل فيها مجهود حقيقي، علشان كده شطارتها بتزيد وبتنور وقيمتها بتكبر ومقامها بيعلى”.
مسلسل تحت الوصاية يعرض في النصف الثاني من شهر رمضان على قناة دي إم سي في تمام الساعة الثامنة مساء.
وتدور أحداث المسلسل عن حنان التي تقوم بدورها منى زكي التي تهرب من أهل زوجها بعد وفاته خوفا من فرض الوصاية عليها وعلى أولادها وتسرق مركب زوجها وتحاول أن تقوم بالعمل في مهنة الصيد من أجل أولادها وتوفير حياة كريمة لهم.
