مذيع «راديو إنرجى»: متحمس لإنترفيو سميرة سعيد وبعمل دايت عشان أتصور معاها

قال باسم كميل مذيع راديو إنرجي عن أسباب اختيار سميرة سعيد نجمة شهر يونيو في إنرجي: إحنا من أول 2021 قررنا إن هيبقى في نجم لكل شهر في إنرجي، فنان أو فنانة نحتفل بيهم الشهر كله.

وأضاف كميل في تصريحات صحفية أنه في شهر 6 قررنا نحتفل بسميرة سعيد لإنها من أكبر الفنانات في الوطن العربي والعالم كله وحاصلة على جوائز عالمية كبيرة جدا واحنا كلنا في إنرجي بنعشقها وبنحب أغانيها وبنشغلها على طول وبنحبها جدا.

وتابع قائلا: هي اختيار واضح وحلم من أحلامنا كلنا مذيعين إنرجي إننا نسمع ونشوف ونقضي يوم مع سميرة سعيد، وسبب الاختيار إنها واحدة من أكبر الأسامي في العالم العربي والعالم كله".

استعدادات خاصة

وعن تفكيره في الاستعداد للحلقة بعدما علم أنها ستكون ضيفة الراديو هذا الشهر، قال: استعدادي للحلقة مع سميرة سعيد بدأ من أول الشهر من بعد ما خدنا القرار وسمعت كل الألبومات القديمة واتفرجت على كل الحوارات السابقة وكل الفيديو كليبات بتاعتها وقريت كل الحاجات اللي مكنتش أعرفها عنها وتحضيرات الإعداد للحلقة بدأت من أول الشهر.

وأوضح أننا بنجمع معلومات وبنذاكر وبنشوف الأسئلة اللي ممكن يبقى الجمهور مهتم يسمع إجاباتها، وبنختار اللعب اللي هنلعبها معاها لإن دي مش حلقة عادية مع نجمة كبيرة فالاستعداد ليها بدأ من بدري قوي وبكل الطرق اللي أي حد يتخيلها، كإنك بتدرسي عشان تدخلي امتحان والامتحان هو الإنترفيو مع النجمة سميرة سعيد.

وعن اختيار راديو إنرجي ليكون أول محطة إذاعية تستضيف سميرة سعيد، قال إن شرف كبير جدا إن سميرة سعيد اختارت تكون أول لقاء لها في محطة إذاعية على راديو إنرجي، وده شرف لأي حد شغال في راديو النجمة دي تختاره يكون أول محطة تستضيفها وحاجة تتكتب في السي في "أنا استضفت سميرة سعيد".

وحول الموضوعات التي سيتناولها خلال الحلقة، رد قائلا: "من الموضوعات اللي نفسي أتكلم فيها مع سميرة سعيد قد إيه هي بتحب تغير في شكل المزيكا اللي بتقدمها للجمهور عشان ميزهقش".

وتابع قائلا: "احنا بنتكلم في نجمة سيرتها والكارير بتاعها ممتد لأكثر من 40 سنة وقدمت أكثر من 300 أغنية فهي فنانة ممكن تكون عملت كل أنواع المزيكا اللي حد يتخيلها في الدنيا".

واستطرد: "هي على طول في تغيير مستمر وبتعمل أنواع مزيكا جديدة وبتتعاون مع ناس جداد شباب أو أسامي كبيرة جدا فا أنا نفسي أعرف دايما ليه هي بتحب التغيير وسر شبابها اللي على طول موجود ومش شباب الشكل بس شباب الروح كمان".

يوم ورا يوم

وعن ذكرياته مع ألبومات وأغاني سميرة سعيد، أكد أن سميرة سعيد ليها مكان خاص جدا في قلبي، ومن وأنا صغير بحب المزيكا الأجنبي وأبويا وأمي حاولوا معايا أسمع عربي مكنتش برضى لحد ما سمعت أغنية يوم ورا يوم.

يوم ورا يوم دي مزيكا ستايل غربي بس الكلام واللحن شرقي وعلقت في دماغي وبعدين نزل ألبوم يوم ورا يوم وده الألبوم اللي حببني في المزيكا الشرقي والأغاني العربي بوجه عام لأنه عام مزيج بين المزيكا الغربي والغناء الشرقي الطربي الأصيل.

وأوضح أول حاجة افتكرتها لما عرفت إنها هتكون معانا، افتكرت ألبوم يوم ورا يوم اللي عندي السي دي بتاعه لحد دلوقتي اشتريته بنفسي واتجرح من كتر ما سمعته، أنا حافظه أغنية أغنية وكلمة كلمة وده الألبوم اللي حببني في المزيكا العربي.

وتابع الإنترفيوهات مع المشاهير بالنسبة لي بتبقى فيها رهبة شوية وبكون حاسس إني هقعد قدام نجم كبير حتى بعد 11 سنة مذيع في الراديو لسه بشوف إني على قدي جدا وأجي جنبهم ايه الناس دي.

بس سميرة سعيد بالنسبة لي هي قلق جدا ورعب إلى جانب الرهبة لإني هقعد قدام واحدة أثرت فيا وفي حبي للمزيكا العربي بشكل كبير جدا.

فأنا متحمس وقلقان جدا ومتوتر وعمال بذاكر بطريقة فظيعة محصلتش قبل كده في أي حوار مع المشاهير وبعمل دايت عشان لما أتصور معاها شكلي يبقى حلو وتحضيراتي للانترفيو بصراحة في نطاق أوسع بكتير من أي تحضيرات حصلت لانترفيو قبل كده.

وعن التحضير لمفاجآت لسميرة سعيد في الحلقة، قال إن في مفاجآت كتيرة جدا محضرينها لسميرة سعيد وهيبقى انترفيو مختلف وهي هتتفاجيء كمان بالحاجات اللي هنلعبها معاها ع الهوا ومش هيبقى زي أي انترفيو بيتعمل مع فنان وخلاص.

وأضاف لأن إنرجي أصلا محطة شبابية ولازم نبين روح الشباب في الإنترفيو ونقول لسميرة سعيد إن احنا بنحبها ويكون في مفاجآت كبيرة.