خلاف عمره 7 سنوات.. أيمن بهجت قمر يرد على «أبو الليف» (صور)

عاد الفنان الشعبي نادر أبو الليف، لفتح الخلافات السابقة بينه وبين الشاعر الغنائي أيمن بهجت قمر الذي يعد ابن شقيقته في الوقت نفسه، واتهمه بأنه سبب من أسباب الوضع الذي يعيشه حاليا وأنه حاليا بلا عمل وأنه يفكر حاليا في بيع سيارته وتحويلها لتاكسي، وأن أيمن بهجت قمر سبب في سقوطه، كما أنه سبب في التعريف باسمه، وأن هناك قطيعة بينهما منذ 7 سنوات.

واضطر أيمن بهجت قمر للرد على أبو الليف بمنشور طويل، قال فيه، "فيه موضوع متعلق من سبع سنين أنا ما اتكلمتش فيه بس واضح أن الفنان نادر أبو الليف اللي بتجمعني بيه صلة قرابة مصمم إنه يخليني اتكلم وأنا هتكلم بالأصول واحتراما لصلة القرابة، أكتر من مرة نادر طلع بيلمح إننا قصرنا معاه أو حاجات من هذا القبيل وآخرهم على أحد المواقع الصحفية، ده وبما إنه كلام يخص العمل مش عن العلاقات الشخصية فأعتقد التوضيح ممكن يكون مهم عشان نقفل الصفحة دي وكلامي كله عليه شهود موجودين من زملاء ومن أقارب كمان من الدرجة الأولى".

وأضاف أيمن، "في ٢٠٠٩ لما اشتغلنا أنا وتوما والملحن محمد يحيى وقدمنا أول ألبوم لأبو الليف من إنتاجنا إحنا ما استخسرناش أي حاجة معاه وعملنا ألبوم كسر الدنيا واللي حضراتكم ماتعرفهوش إننا لما تعاقدنا مع جمال مروان شركة ميلودي في وقت عزها وعز قنواتها اتفقنا أنا ويحيى وتوما على إن المبلغ اللي هتدفعه ميلودي هنقسمه على أربعة ومافكرناش إننا أسماء ونادر صوت جديد وبعد ما نحسب مثلا التكلفة الفعلية الكبيرة للألبوم واعتقد الكواليتي كان واضح يعني إحنا كنا جدعان معاه وأوي كمان وكنا كمنتجين بناخد نسبة إحنا التلاته ١٠ في المية لكل واحد يعني لو أبو الليف طلع فرح كان بيطلع لي ٣٠٠ جنيه".

وتابع " حصلت مشاكل وميلودي كانت بتقفل وحصل بينا وبينهم مشاكل وقضايا وكان أبو الليف هيتوقف لجأنا للمستشار مرتضى منصور اللي وقف جنبنا وقتها بلا مقابل بسبب تعاطفه معانا وبسبب تاني إن امير مرتضى كان عايز يخدمني ويستجدع معايا كعادته وبالفعل نجحنا إننا نتعاقد مع شركة نجوم ريكوردز ومضينا معاهم وتاني قسمنا مبلغ التعاقد على أربعه برغم اني كنت بطلع خسران كل البوم ومابكملش أجري كشاعر في الاغاني بس كان حماسي طاغي للتجربة".

وذكر: "نزل الألبوم وقت نجاح الإخوان وماعملش جو وابتدت البلد تدخل في ظروف صعبة وفي وقت الإعلان الدستوري لمرسي والبلد في مظاهرات وواقفة ابتدى نادر يضغط.. هو أنا ليه مش بنزل حفلات ؟ فين الكليبات؟ فين الافراح ؟ مع إن الشعب كان قاعد عند الاتحاديه والتحرير وقتها".