آليات التقدم بتظلمات للمستبعدين من بطاقات التموين

"الدستور" تشرح كيفية تقدم تظلم لو مستبعد من بطاقات التموين:

- قدم التظلم لمكتب التموين اللى فى المنطقة بتاعتك، ومرفق بالمستندات المطلوبة الدالة على صحة البيانات.

- المستندات المطلوبة بتكون على حسب نوع التظلم:
1- لو مستبعد عشان مرتبك أو معاشك كبير بتجيب بيان مفرادات مرتب من جهة العمل أو التأمينات.
2- لو مستبعد عشان عندك سيارة أو أكتر بتجيب شهادة من المرور معتمدة تفيد بامتلاكك سيارة موديلها إيه أو لا تمتلك.
3- لو مستبعد عشان استهلاك كهرباء عالى فأنت محتاج بيان معتمد من شركة الكهرباء يفيد بمتوسط استهلاكك الشهرى.
4- لو مستبعد عشان فاتورة محمول عالية فأنت محتاج فواتير معتمدة من شركة المحمول بمعدل استهلاكك الشهرى.
5- لو مستبعد عشان عندك أرض زراعية بتجيب شهادة معتمدة من الجمعية الزراعية التابعة ليك تفيد بامتلاكك لأرض مساحتها كام أو لا تمتلك.
6- لو مستبعد عشان مصاريف مدارس ولادك عالية محتاج شهادة معتمدة من مدرسة أولادك تفيد بقيمة المصاريف السنوية المدفوعة.
7- لو مستبعد عشان جمارك عالية فأنت محتاج شهادة من مصلحة الجمارك تفيد بقيمة الجمارك المدفوعة.
8- لو مستبعد عشان ضرائب عالية فأنت محتاج شهادة معتمدة من مصلحة الضرائب تفيد قيمة الضرائب المدفوعة سنويًا.
- المستندات بيتم إرفاقها بصورة البطاقة التموينية المراد تفعيلها.
- بعد ما يستلم مكتب التموين التظلمات المقدمة من المواطنين بيسجلها على موقع تموين دعم مصر.
- التظلم المسجل بيتم فيه توضيح "الرقم القومى ورقم المحمول، نوع التظلم، رقم البطاقة الذكية".
- بعد ما يسجل مكتب التموين التظلم بيرسل الكشوف المعتمدة من رئيس المكتب إلى مديريات التموين ثم يتم إرسالها إلى الوزارة.