صاحب الاستوديو في واقعة مؤمن زكريا: "معرفشي المتهمين وعيل طبع عندي الصورتين بـ 40 جنيه"
تواصل "الدستور" نشر نص تحقيقات النيابة في القضية رقم 6904 لسنة 2024 جنح الخليفة، بشأن فبركة سحر لـ مؤمن زكريا، 36 سنة، لاعب كرة قدم سابق، ومنها أقوال المتهم الأخير ماهر، والذي تم إخلاء سبيله على ذمة القضية.
س: ما قولك فيما هو منسوب إليك من أنك متهم وآخرين بإذاعة أخبار وإشاعات كاذبة عمدًا بقصد تكدير الأمن العام والقاء الرعب في الناس وإلحاق الضرر بالمصلحة العامة؟
ج: محصلش.
س: ما الذي حدث إذا وما هي ظروف ضبطك وعرضك علينا؟
ج: اللي حصل أني شغال مصوراتي وعندي استوديو التونسي في الإمام الشافعي من حوالي أسبوعين جاتلي البنت اللي معايا بره ديه ومعاها عيل صغير أول مرة أشوفهم ومعرفهمش وكان معاهم صورة مؤمن زكريا على التليفون وقالتلي عاوزة تطبع أربع صور فوري قولتلها معنديش مشيت وتاني يوم جالي العيل الصغير اللي كان معاها وجاب موبايله وكان معاه صورة مؤمن زكريا على التليفون وقالي أنه عاوز يطبع صور لمؤمن زكريا فقولتلها تمام وأخدت الصورة وقولتله الحساب أربعين جنيه وأديته وصل وقولتله تعالى بكره خد الصور وجه تاني يوم استلم الصور ودفع الأربعين جنيه حساب الصور ومشي.
وهو ده كل اللي حصل وأنا معرش عاوز يعمل بيهم إيه وامبارح الساعة 4 جه ميكروباص أحمر في ضابط مباحث وعدد اثنين أمناء شرطة سألني على الاستوديو فاتح قلتله أه فاتح قالي أنت ماهر وقالي تعرف أسماء ناس مش فاكرهم ولقيته اتصل بالتليفون ورحت معاه على القسم وبيتوني واتعرضت على النيابة الصبح وده اللي حصل.
س: متى وأين تم ضبطك تحديدا ؟
ج: امبارح 29 سبتمبر الساعة 4 مساءا من امام ستوديو بتاعي في الإمام الشافعي.
س: ما سبب ومناسبة تواجدك بالزمان والمكان أنفي البيان؟
ج: انا كنت شغال في الاستوديو بتاعي.
س: من كان برفقتك؟
ج: كنت لوحدي.
س: ما هي صلتك بالمتهمين تحديدا؟
ج: معرفهمشي وأول مرة أشوفهم.
س: من القائم على ضبطك تحديدا ؟
رئيس المباحث ومعاه ست أمناء.
س: ما سبب قيامهم بضبطك تحديدا ؟
ج: معرفشي.
