"أنا معملتش حاجة".. ماذا قال رمضان التربى صاحب واقعة فبركة سحر مؤمن زكريا؟

تواصل الدستور نشر نص تحقيقات النيابة في القضية رقم 6904 لسنة 2024 جنح الخليفة، بشأن فبركة سحر لـ مؤمن زكريا، 36 سنة، لاعب كرة قدم سابق، ومنها أقوال رمضان محمد التربي.

س: ما تفصيل اتهامك؟

ج: اللي حصل إني شغال تربي في مقابر سيدي عقبة وفي يوم كنت بزرع صبارة في الترب مرة واحدة، وأنا بحفر لقيت كيس بلاستيك فمسكته وفتحته عشان أشوف فيه إيه لقيت فيه لفتين، وبفتح أول لفة لقيت مكتوب فيها طلاسم وحاجات مش مفهومة، واللفة التانية بفتحها لقيت فيها ثلاث ورقات بيض مكتوب عليها كلام مش مفهوم وفيها صورة كابتن مؤمن زكريا، والصورة مكتوب عليها بالأحمر كلام مش مفهوم ومدبس فيها أكثر من دبوس ومكتوب عليها بالأحمر، وساعتها أنا صورتهم بالتليفون بتاع محمد جوز أمينة واتصلت بمحمد قريبي وقلتله على اللى أنا شفته وساعتها هو قالي إنه يعرف حد يوصلني بالكابتن مؤمن زكريا، وبعد كده لقيت واحد اسمه مصطفى ومعاه واحد صاحبه وقالي إنه قریب مرات مؤمن زكريا، وساعتها طلب مني إنه يشوف الأعمال اللي أنا شوفتها في المدفن، فوريتهاله وقالي إن مرات مؤمن زكريا هتتواصل معايا، وبعدها بيومين لقيت كابتن مؤمن زكريا واتنين شيوخ وأبو مؤمن زكريا ومصطفى والشيوخ قدامي.
وطلبوا مني أجيب الأعمال عشان يشوفوها وبعدها قعدوا يطلبوا مني خل ومايه وسلطانية على أساس أنهم بيفكوا الأعمال، وبعد كده طلبوا مني أنهم يشوفوا المكان اللي أنا لقيت فيه الكيس ده وريتهلهم والشيخ طلب منى أحفر شوية كمان وطلع ساعتها من الحفرة اللي جنب التربة حتتين فخار وسلك، وبعد كده حط زرعة الصبار وسقاها بمية مقري عليها قرآن.
 

س: وماذا حدث عقب ذلك؟

ج: بعد كده مشيوا لقيت محمد.ع بيقولي إنه صورنا وإحنا بنفك العمل وساعتها أنا طلبت منه إنه يمسح أي حاجة صورها عشان مينفعش نتاجر بمرض حد، وبعدين وتاني يوم وأنا رايح أجيب علاج من الصيدلية لقيت الصيدلي بيقولي إيه موضوع مؤمن زكريا قولتله إنه كان فيه أعمال ليه في المقابر وفيه شيخ جه فكها.

 س: كيف تم نشر الصور على مواقع التواصل الاجتماعي؟

ج: أنا وريتها للدكتور وطلب مني أبعتله الصور فبعتهاله بحسن نية، وبعد كده لقيت حد بيتصل بيا وبيقولي إنه هو جاري وبيسألني على موضوع مؤمن زكريا فحكيتله وبعدها على طول لقيت المكالمة اللي كانت بيني وبين الراجل ده، ويوم السبت اللي فات لقيت رئيس المباحث بيتصل بيا وبيقولي أنا عند البيت عندك وقالي عاوزك تيجي لي حالًا وفعلًا أنا رحتله عند البيت وقالي إيه ياعم اللى إنت عامله.

قلتله أنا معملتش حاجة وطلب مني إني أوريله مكان الحفرة اللي كان فيها الأعمال فوريتهاله وحكيت له على كل اللي حصل، وبعد كده راح أخدني وركبني ميكروباص وطلعنا على قسم الخليفة، وفي القسم طلعت وحدة المباحث وفضلت قاعد في المباحث، وبعد كده لقيتهم نزلوني الحجز وبعدها جابوني على النيابة وهو ده كل اللي حصل.