منى زكى بعد نجاح "تحت الوصاية": الزمن بيتغير ونتمنى إعادة النظر فى القوانين
علقت الفنانة منى زكي، على نجاح مسلسلها الأخير "تحت الوصاية" الذي عُرِض خلال الموسم الرمضاني الماضي وحقق نجاحًا ساحقًا.
وكتبت في منشورٍ عبر صفحتها الرسمية بموقع "فيسبوك": "مع انتهاء موسم رمضان حابة أوجه الشكر لجمهوري في مصر والوطن العربي كله على كل التشجيع والحب اللي وصلني منكم.. شكرًا لكل شخص أخد من وقته وكتب كلمة حلوة عن مسلسل تحت الوصاية".
وأضافت: "أحب كمان أوجه الشكر لناس كتير جدًا بداية من المخرج العظيم محمد شاكر خضير اللي عارف اللي في قلبي تجاهه، وقد إيه هو فنان موهوب وعنده رؤية وحساس جدًا.. وعلى المستوى الشخصي إنسانيته تفوق أي شيء أنا شوفته قبل كده، أنا بأدين له بكل الفضل على أي حاجة حلوة في المسلسل".
وتابعت: "بشكر المنتج الكبير محمد السعدي وشركة ميديا هب، وخالد وشيرين دياب على الفكرة والموضوع والإبداع اللي مش جديد عليهم وبيبهرونا في كل عمل جديد بمواضيع مهمة، ومدير التصوير المتميز بيشوي روزفلت اللي قدّم صورة عالمية.. وأحمد حافظ المونتير العالمي اللي اتشرفنا بوجوده معانا، والإشراف الفني والديكور للمهندس محمد عطية اللي موهبته طاغية في الوطن العربي كله، والشاطرة مصممة الأزياء ريم العدل والموسيقي التصويرية للمبدعة ليال وطفة وبشكر مساعدي الإخراج على تعبهم ومثابرتهم.. وقسم الإنتاج، وعلى رأسهم المنتج الفني هاني عبدالله وكل رجالته.. ومهندس الصوت إسلام عبد السلام. .. والـ acting coach رامي الجندي، ومساعدتي الشخصية شيماء.. وطبعا فريق وكالة جينجر".
وواصلت: "قبل أي حاجة بوجه الشكر طبعًا لزمايلي في المسلسل اللي كلهم معجونين موهبة ولولاهم مكنش تحت الوصاية ظهر بالشكل ده.. حقيقي هما كتلة من المواهب المتحركة وعاشقين للفن من أكبر حد فيهم لحد البنوتة الصغيرة اللي فاجئتنا كلنا، وأخيرًا مش ممكن أنسى أهالي عزبة البرج وأجدع صيادين في مصر.. واللي حسسوني أني بقيت واحدة منهم طول فترة استضافتهم لينا".
واختتمت: "حقيقي فرحت بتعليقاتكم وتفاعلكم مع المسلسل، وأتمنى إنه يكون نقطة بداية لإعادة النظر في قوانين الوصاية وإعطاء الأمهات الحق في أولادهم.. الزمن بيتغير والأوضاع بتتغير والمرأة والأم والزوجة مش عنصر هامشي، دي الأساس اللي قايم عليه كل البيوت، وهي الأصل في حياة أولادها.. وكذلك الأب.. لذلك نتمنى من المشرّع إعادة النظر في مسألة الوصاية وفي بنود كتير في قانون الأحوال الشخصية عشان نحفظ حقوق الأولاد والآباء والأمهات".
