معتز العرينى عن مسلسل «الصفارة»: «بجد حلو أوي ورسالته جميلة جدا»

أشاد الكاتب والمؤلف معتز العرينى بمسلسل الصفارة للفنان أحمد أمين. 

وكتب “العريني” فى منشور له عبر صفحته على الفيس بوك: "مسلسل "الصفارة" بجد حلو أوي ورسالته جميلة جدا.. يعني مش حاجة كوميدية تافهة كده، رغم إن القصة ممكن تكون مهروسة، بس معمولة بشكل مختلف.. يعني لما "أحمد أمين" زميله سرق فكرته وبقى صاحب الشركة.. بعد سنين لقى راجل بيقوله استخدم الصفارة دي وهترجع للموقف اللي ـنت حابب تغيره وهيبقى قدامك ٣ دقايق تغير فيها اللي أنت عايزه.. وفعلا هيلحق يعلن عن الفكرة بتاعته وهيبقى صاحب الشركة وهيتغني أوي، بس هيتخن وهيبقى عنده أمراض وعيلته مش هتبقى طايقاه لأنه علطول في الشغل ومنشغل عنهم وهيبقى شخص وحش وهيحس إنه لوحده.. بعدها هيفتكر باباه وهو بيقوله إني لو سافرت الخليج عشان أجيب فلوس كتير هسيبك أنت وماما.. وأنا عايز أكون أب حقيقي!".

وقدم فى نهاية منشوره نصيحة للمشاهدين قائلا: "حياتنا دي عبارة عن اختيارات وقرارات بناخدها.. وهندفع تمن أي اختيار نختاره.. وحياتنا الجاية هتتبني على أساسه.. عشان كده المفروض نحمد ربنا على تدبيره واختياره لينا في حاجات كتير مش بإيدينا".

ويظهر الفنان أحمد أمين، خلال أحداث مسلسله الجديد "الصفارة" بأكثر من لوك وشكل حسب الإطار الكوميدي الذي تدور حوله الأحداث، حيث ظهر "أمين" مرة بوزن زائد، ومرة بلطجي وباستايلات شعر مختلفة. 

تدور أحداث مسلسل "الصفارة" المكون من 15 حلقة فقط، في إطار كوميدي تشويقي، فكرته مأخوذة عن رواية أجنبية بعنوان "Sound Of Thunder- تأثير الفراشة".

ويجسد أحمد أمين دور "فؤاد"، ويعمل مرشدًا سياحيًا، يسرق "صفارة" أثرية من سيوة تعيده إلى الماضى، ليدخل في مغامرات كوميدية، وتنقلب بسببها حياته رأسًا على عقب.