أعظم مباراة فى الكاس

بـ مناسبة كاس مصر لا يمكن أنسى أعظم مباراة شفتها في تاريخ المسابقة، كانت موسم 2016- 2017، واسمع بقى اللي جرى.
أول حاجة اتنين لاعيبة من المقاصة نزلوا لابسين رقم 14، إزاي عدى الموضوع على إداري الفريق، على الحكام، ع الكل كليله، ما اعرفش، بس الحكم ما خدش باله غير في الشوط التاني، فـ الحكم قال لهم، خلاص يا ولاد، مفيش مشكلة، بس غيروها دلوقتي، فـ لاعب منهم غير ولبس رقم 4.
بعدين، المقاصة سجلت هدف، لـ حسين الشحات، اللي كان بـ يلعب هناك وقتها، ثم سجلت هدف تاني لـ محمد مسعد، وبعد دقيقتين كدا الحكم قرر إن النتيجة ترجع واحد صفر تاني ليه؟ علشان الجون التاني جه من لعبة، أصلها رمية تماس على المقاصة. 
مكانش وقتها فيه تقنية فيديو، طب محسبهاش من الأول ليه؟ علشان مشافهاش، طب والمساعد؟ برضه مشافهاش، أومال مين اللي قال لـ الحكم إنها رمية تماس، الحكم الرابع، اللي كان ساعتها الحكم السادس، عشان فيه خمس حكام في الملعب، واحد لـ الصفارة وأربعة مساعدين، بس كان برضه بـ يسموه الرابع. 
ما علينا، طب لما الحكم الرابع قال له، حسب الهدف ليه؟ علشان مكنش مقتنع، طب ولغى الهدف ليه بعد دقيقتين؟ علشان راجع نفسه واقتنع.
تمام، الشوط التاني، الحكم طرد مودي لاعب المقاصة علشان إنذارين، بعدها بـ دقيقتين، طرد لاعب من المريخ طرد مباشر، اللاعب أعترض، واتشال واتهبد، بس الطرد مشي، بعد شوية لقينا اللاعب لسه في الملعب، طلع الحكم راجع نفسه، وقرر طرد لاعب تاني خالص، بس برضه من المريخ.
المريخ سجل جون، يعني كدا بقت واحد واحد، وخلص الماتش.
لعبوا إكسترا تايم، لاعب من المقاصة أصيب، وكانوا غيروا التلات تغييرات، فـ المقاصة كمل تسعة.
بعد شوية، لاعب من المقاصة انفرد بـ الجون، الباك بتاع المريخ شده بره منطقة الجزاء، الحكم حسب فاول، طلع كارت، الكل كان متوقع كارت أحمر، هو ادى اللاعب كارت أصفر بس.
لاعب المقاصة اعترض، وحصل هرج ومرج، والحكم أصر على إنه كارت أصفر بس، وأمر بـ استئناف اللعب، بعدين، فيه حد قال لـ الحكم حاجة، فـ اكتشف إن مدافع المريخ اللي لسه واخد إنذار، هو اللي كان بـ يعترض ساعة الطرد، ووقتها الحكم اداله إنذار، فـ كدا دا الإنذار التاني ليه، قام مراجع نفسه، فـ طرده، والفريقين بقوا تسعة لاعيبة.
في الدقيقة 120، المقاصة سجلت الهدف التاني، الهدف التاني اللي بـ جد، والماتش خلص، وانتقلنا لـ الاستوديو، إعلانين ورجعنا، علشان المذيع يقول لنا: إن فيه معلومة غير مؤكدة إن الماتش خلص تلاتة واحد لـ المقاصة، مش 2/1، وبعد اتصالات، تأكدوا فعلا إن فيه هدف تالت جه، لـ حسين الشحات برضه.
جه إمتى؟ بعد الماتش ما خلص.
ازاي؟ ما هو لما المخرج نزل بـ التتر ونقلها لكم فلان الفلاني، كانت غلطة، المخرج افتكر إنه كدا خلاص، بس مكنش الماتش لسه خلص، فـ إحنا انتقلنا لـ الاستوديو، وفاضل حبة، جه فيها الهدف التالت.
بعد دا كله، ييجي واحد يقول لي بـ تتابع المباريات المحلية ليه؟
بـ الذمة دا سؤال؟