لقاء الخميسى عن أزمة منع مطربى المهرجانات من الغناء: «الحل هو الاحتضان»
علقت الفنانة لقاء الخميسي، على الأزمة الحالية بين مطربي المهرجانات الشعبية وقرار منعهم من الغناء وإحياء حفلات من قبل نقابة المهن الموسيقية.
ونشرت لقاء الخميسي، صورة عبر حسابها الرسمي على موقع تبادل الصور والفيديوهات "إنستجرام"، وعلقت عليها قائلة: "أول مرة أتكلم وأقول رأيي المتواضع في أي حاجة بتحصل، الدنيا قايمة على موضوع شاكوش والأغنية والحفلة اللي في الاستاد وعيد الحب، أنا مش مع وقف مغني خد تصريح قبل كدا من الرقابة وبيقدم لون شعبي وليه جمهور عريض، بالعكس أنا مع احتضانه والاتفاق معاه بأنه يختار كلمات الأغنية بعناية طالما أنا عندي يقين إنه ممكن يفيد البلد في تقويم الجمهور، قصدي نلعبها بصياعة ويبقى بيقدم فنه بس بكلام متنقي وشعبي وسهل برده".
وتابعت: "الاستاد دا مكان مهم جدا، حرم كروي إذًا أي حفلة بتتقدم فيه لازم تبقى على قدر وضعه، لأنه كمان الحفلة بتتعرض على الهوا، وأنا مش شايفة من رأيي إن الحفلة أساسا مكانها الاستاد بس إذا افترضنا إن مفيش غيره، يبقى لازم ننتقي المغنين والفنانين بقى، حفلة معروضة ع الهوا لشعب كامل يبقى أنا اللي اختار واجهة للعالم وللشعب، مغني مصري ناجح في بلده وناجح عالميا، مش مغني مهرجانات لأنه دا لون من ألوان الغنا لكنه مش واجهة الفن المصري الأصيل اللي اترسمله شخصية من سنين السنين، فكرة الاختيار والتوقيت والمكان، هو دا الصح لكن تمنع مغني ليه جمهور يغني أنا مش شايفة إن دا حل، الحل هو الاحتضان وأنه يتوجه صح طالما ليه جمهور عريض وممكن نستفيد منه، شكرا".
كان نقيب الموسيقيين هاني شاكر، أصدر تنبيهًا على كل المنشآت السياحية والبواخر النيلية والملاهي الليلية والكافيهات بعدم التعامل مع مطربي المهرجانات.
وأكد هاني شاكر، أنه لا يقبل ما حدث مؤخرًا من تجاوز بالألفاظ في حفل أقيم باستاد القاهرة من أحد هؤلاء حسن شاكوش، والتعدي بكلمات تخالف العرف القيمي وتتعدي على الرواسخ الثابتة للمجتمع المصري، وأنه ومجلس النقابة سيعيدون النظر في كل التصاريح بالغناء أو عضوية النقابة في ضوء المعايير والقيم التي يقبلها المجتمع.
