طالب يشجع أصدقائه على الرياضة بمبادرة «احرق دهونك أسبوعيا»
منذ أن كان طفلًا صغيرًا وهو يعشق مُمارسة الرياضة، ويُكرّس لها وقته وطاقته، بجانب دراسته، إدراكًا منه بأهمية الدور الذى تلعبه الرياضة فى المجتمع، وما لها من فوائد جسمية ونفسية واجتماعية وعقلية على صحة الفرد، فما كان منه إلا أن شجع أصدقائه على مُمارسة رياضة الجرى.
«احرق دهونك مرتين فى الأسبوع».. شعار رفعه محمد عماد الجندى، صاحب الـ 18 عامًا، والطالب بالصف الثالث الثانوى، أحد أبناء محافظة كفر الشيخ، فى بادرة طيبة منه، لتشجيع أصدقائه على مُمارسة رياضة الجرى، وحظيت بتشجيع كبير من المُحيطين به، وذلك لأهمية الرياضة فى القضاء على انتشار المخدرات بين الشباب، ونبذ العنف والتطرف.
«أنا من صغرى بمارس الرياضة، وحاليًا بمارس رياضة اسمها cross fit، وهى عبارة عن رياضة فيها لياقة بدنية وبناء عضلات، وبتركز على المرونة والرشاقة والتنفس الصحيح، وفكرة الجرى دى كانت حاجة أساسية من الرياضة اللى بمارسها لأنها رياضة مُمتعة جدًا»، كلمات قالها «الجندى»، لـ«الدستور».
وأضاف «الجندى»، «رياضة الجرى لها فوائد كتير جدًا، منها: إنها بتحرق الدهون، وبتطول النفس، وبتظبط الجسم، وبتخلى شكل الشخص حلو، بجانب إنها ليها علاقة كبيرة بالصحة النفسية، يعنى لو حد مضايق وجرب إنه ينزل يجرى هيرجع شخص نفسيته سليمة، ومُؤهل لأى حاجة، وده كان دافع قوى إنى أشجع أصدقائى على مُمارسة رياضة الجرى».
يبدأ «الجندى» وأصدقائه مُمارسة رياضة الجرى مع بداية شروق شمس كل يوم، فى تمام الساعة السادسة صباحًا، يُتابع: «اتفقت أنا ومجموعة من أصدقائى على ميعاد غالبًا بيكون الساعة 6 صباحًا، وده الوقت إللى نعرف ناخد منه استفادة كبيرة من الجرى، وبيكون يومين في الأسبوع بنحددهم مسبقًا، كمان بيكون فيه استعدادات مُعينة قبل الجرى، ومنها إننا بنظبط أكلنا قبلها بكذا يوم، يعنى بنمنع نفسنا من الدهون والزيوت وغيرها».
وأوضح «الجندى»، «مُمارسة رياضة الجرى كان لها أثر إيجابى عليا، منها طول النفس، ونحت وتنحيف الجسم، وكمان بعدتنى أنا وأصدقائى عن السجاير والمخدرات وأى شئ يدمر الصحة العامة، وعلمتنى حاجات كتير منها إن الحاجة لازم تيجى تدريجى يعنى كنت الأول بجرى 5 كيلو بس دلوقتى الحمد لله اقتربت من الـ 15 كيلو أنا وأصدقائى، وعلمتنى الصبر».
يحرص «الجندى» على أن يكون وقتا لاستنذكار دروسه بجانب رياضة الجري حيث يقول «الجرى مش بياخد وقت هو بيبقى مرتين فى الأسبوع والحمد لله بخلص مذاكرتى وبطلع أجرى وأصدقائى كذلك، وطموحى أبقى دكتور أسنان إن شاء الله، وإنى أشرف أهلى، وبالذات أخويا عشان تعب معايا جامد، ونصيحى للشباب الاهتمام بممارسة الرياضة بشكل عام، والابتعاد عن أى عادات سيئة بتدمر الصحة العامة».
