قبل انتقاله لـ نيس.. محمد عبدالمنعم يودع الأهلى برسالة مؤثرة

وجّه محمد عبدالمنعم، مدافع الأهلي، رسالة مؤثرة لجماهير النادي قبيل إعلان انتقاله بشكل رسمي لـ نيس الفرنسي خلال سوق الانتقالات الصيفية الجارية.

ومن المقرر أن يعلن نادي نيس، اليوم، التعاقد مع محمد عبدالمنعم بشكل رسمي.

ونشر عبدالمنعم فيديو عبر حسابه الرسمي على منصة "إنستجرام"، قال خلاله:“عارف يعني إيه تنام وتصحى تلاقي حلمك بيتحقق، دي كانت حياتي في النادي الأهلي من يوم ما كنت طفل صغير كنت شايف نفسي بالتيشيرت الأحمر بلعب قدام جمهور كبير بيهتف باسمي، الحلم ده مش بس اتحقق ده جزء من حياتي وجزء مني 15 سنة مروا عليا في النادي، 15 سنة عشت فيها لحظات كتير من الحب والتحديات والفخر مش مجرد لعب كورة”.

وأضاف عبدالمنعم:“دي كانت رحلة فيها كل لحظة بتشكل جزء مني، يوم ما لبست تيشيرت الأهلي لأول مرة حسيت إن دي لحظة عمرها ماهتتكرر اللحظة اللي عرفت فيها إن بقيت واحد من أولاد النادي اللي حلمت بيه من صغري؛ كل تمريرة قدمتها، كل هدف سجلته كانت مليانة إحساس إني بعمل حاجة عظيمة حاجة أكبر مني”.

وتابع “الأهلي إداني أكتر من اللي حلمت بيه وإداني شرف إن اسمي يرتبط بالنادي العظيم ده، الذكريات مش هتنتهي أنا فاكر أول مرة دخلت ملعب التتش الملعب اللي شاف مجهودنا وعرقنا الملعب اللي شهد على كل فرحة ونصر، وفاكر لما الجمهور أول مرة هتف باسمي اللحظة اللي حسيت بيها إن قلبي هيقف بالفرحة، الجمهور ده هو اللي صنعني هو اللي وقف جمبي في كل لحظة صعبة”.

وأردف “بشكر مجلس إدارة النادي الأهلي بقيادة الكابتن محمود الخطيب، الراجل اللي عرف ازاي يحقق أحلامنا، الراجل اللي كان دايما قدوة لينا كلنا، واللي عمره ما بخل علينا بتعب أو نصيحة؛ بشكر الجهاز الفني والطبي والإداري اللي كانوا دايمًا في ضهري والسند في الأوقات الصعبة، كانوا السبب إني أطلع أفضل حاجة عندي على أرض الملعب”.

وأكمل: “بشكر كل اللاعيبة اخواتي اللي كانوا معايا على الحلوة والمرة، بشكركم على كل لحظة فرح عشناها مع بعض وعلى كل بطولة حققناها كتف بكتف اللحظات دي هتفضل محفورة في قلبي طول حياتي، وطبعًا بشكر عيلتي اللي كانت دايما في ضهري وبتدعمني وكانوا سبب رئيسي في كل اللي وصلت ليه”.

وأنهى: "أخيرًا بشكر كل مشجع للنادي الاهلي العظيم الجمهور اللي هيفضل دايما في قلبي، أنا خرجت من النادي الاهلي كلاعب ولكن هفضل طول عمري مشجع للنادي الأهلي، الأهلي أعظم نادي في الكون وهفضل دايما ابن النادي، النادي اللي علمني إن المجد ملوش حدود وإن الطموح هو اللي بيصنع الأبطال".