«قساوة القلوب».. الجحود يقود الأبناء للسجن وخسارة الآباء للأبد

قلبي علي ولدي انفطر وقلب ولدي علي حجر، مقولة تعبر عن واقع مرير لعقوق الأبناء لابائهم، وجرائم ترتكب بحقهم تمثلت في وقائع قتل.

وخلال التقرير التالي نلقى الضوء علي بعض الجرائم التي وقعت مؤخرا من أبناء ضد آبائهم. 

شاب يقتل والده بأسيوط بالكريك بسبب خلافات على المنزل

أخر تلك الجرائم البشعة عندما أقدم شاب من محافظة أسيوط علي التخلص من والده وقتله لرفضه زواج والده في المنزل.

يقول الشاب في اعترافات عن تفاصيل يوم الجريمة كانت الساعة 7:15 صباحا، لقيت أبويا قالي: عملتوا إيه في مشوار البيت؟ قلتله: مشوار بيت إيه إحنا مش خلصنا؟ راح رد عليا وقالي: البيت ده لازم تطلعوا منه علشان أنا هتجوز فيه، قلتله: نطلع منه إزاي؟ راح قالي: أنا مليش دعوة المهم تطلعوا من البيت إنت وإخواتك، قلتله: إزاي دا أنا جمعتلك 50 ألف جنيه وفاضلك 100 ألف جنيه، خد الـ50 وأنا هكتبلك إيصالات أمانة بـ100 ألف جنيه، فهو قالي: لا أنا عايز الفلوس كلها 150 ألف أو تاخدوا 300 ألف جنيه وتطلعوا من البيت.

فأنا قلتله: إنت منين معاك فلوس تجمع 300 ألف جنيه؟ وقالي: أنا مش هديكم حاجة والورق اللي أنا كتبته عند المحامي أنا هطعن بالتزوير وهطردكم بره البيت، ولو جادلت معايا هقتلك إنت وأخوك والبنت الصغيرة هي اللي هتقعد في البيت.

وقالي: إنت أكتر واحد غايظني فيهم، وراح مسك فردة الكوزلك الشمال "حذاء المباني" في إيده الشمال وقالب طوب في إيده اليمين وراح ضرني بالكوزلك في خدي اليمين، ومفيش فيا إصابات وأنا متعورتش والضربة كانت خفيفة، وبعد كدا كان رايح يضربني بقالب الطوب اللي ماسكه في إيديه وأنا عمال أتراجع لورا وماسك بإيدي الاتنين كوريك المباني، وهو عمال يقرب مني ويقولي أنا لازم أموتك علشان إنت اللي غايظني، وهو كان رافع قالب الطوب ومصر إنه يضربني بيه.

وبعد كدا روحت أنا رفعت الكوريك بإيدي الاتنين وضربته لقيته وقع على الأرض على وشه على الطوب، وضربته أكتر من مرة بالكوريك على راسه 3 ضربات ناحية الإصابة اللي موجودة في راسه، راح هو اتحرك بيديه تحت السلم في المنزل اللي كنا نعمل به، روحت أنا ماسكه من رقبته وضغطت عليها بإيدي وسحبته للخارج وضربته 3 ضربات بالكوريك بتاع المباني على نفس الإصابة، وشفت جزء من المخ لما طلع خارج راسه، وبدأت الروح تطلع، روحت رميت الكوريك ومسكته من رقبته بإيدي الاتنين وبدأت أخنقه وأقول له: "حلو اللي انت عملته، أديك إنت مت وأنا هتحبس ومحدش مننا استفاد حاجة"، وروحت مسكت الكوريك مرة أخرى وضربته تاني على راسه، وبعد كدا طلعت بره البيت وقعت أتكلم في التليفون واتكلمت مع عمي "صابر بسطا" وقلتله أنا قتلت أبويا وبلغوا الشرطة وتعالى، كانت حوالي الساعة 7:40 صباحا".

شاب ينهي حياة والده بطنطا

وفي يناير الماضي انهى شاب حياة والده في مركز طنطا بمحافظة الغربية.

وتلقت الأجهزة الأمنية بمديرية أمن الغربية، وغرفة عمليات الإسعاف إخطارا، من المباحث الجنائية بمركز ومدينة طنطا، بوردو بلاغ من الأهالي، يفيد بقيام شاب بقتل والده مستخدماً فأس، بعزبة مطر التابعة لقرية ميت حبيش البحرية، بدائرة المركز.

وانتقلت قوة أمنية من المباحث الجنائية، وسيارة إسعاف إلى محل الواقعة، وتبين من التحريات والمعاينة الأولية، التي أجراها الرائد حسام قطامش رئيس مباحث مركز طنطا، قيام شاب يدعى «م .ا.ع»، مريض نفسي، بضرب والده على الرأس مستخدماً فأس، مما أدى إلى وفاته في الحال ولم يتمكن أحد من إنقاذه.

شاب يتخلص من والده بالسلام 

وفي ديسمبر الماضي لعام 2022 شهدت منطقة السلام بالقاهرة واقعة قتل رجل علي يد ابنه.

تلقى قسم شرطة السلام بلاغا يفيد بالعثور على جثة شخص بدائرة قسم شرطة السلام.

وبالانتقال والفحص، تبين وجود جثة لشخص مرتدي كل ملابسه وملقى بأحد شوارع منطقة السلام.

ومن خلال التحريات تبين أن وراء إرتكاب الواقعة نجل المجني عليه.

تم اتخاذ الإجراءات القانونية اللازمة حيال الواقعة.