تعليق بوسى وزوجها على شائعات انفصالهما.. وتتحدث عن وفاة والدها للمرة الأولى

تحدثت المطربة الشعبية بوسي على شائعة انفصالها عن زوجها مصفف الشعر هشام ربيع، والتي انتشرت خلال الأيام الماضية عبر صفحات مواقع التواصل الاجتماعي.

وقالت المطربة بوسي، خلال مداخلة هاتفية لبرنامج "90 دقيقة"، مع الإعلامية بسمة وهبة، المذاع عبر فضائية “المحور”: "أنا مبحبش أرد على الشائعات ومش هرد على حاجة، أنا بتكلم عن شغلي بس، واتفقت معه على أن يرد طليقته لأني عارفة قيمة الضنا، وأولاده صحاب ابني، ولما اتجوزنا كان منفصل عن مراته من فترة وعمري ما هتجوز راجل وعلى ذمته واحدة تانية". 

وأضافت بوسي: "الناس بتشتمني وبتغلط فيّ من غير ما تعرف عني حاجة أو تتحرى عني، ولا أفهم سر انشغال السوشيال ميديا بحياتي الشخصية".

وفاة والدها

وعن تجاهلها وفاة والدها قالت بوسي: "اللي بيقول باباها ميت غضبان عليها، إيش عرفك؟! انت كنت من بقية أهلي، ليه بتدعوا الكلام؟! المشكلة إن الكلام من زمايلي اللي واكلين معايا عيش وملح، الكلام ده طلع من زميل ومش هقول اسمه هو زعلان مني عشان معزمتهوش على الفرح". 

وتابعت: "ناس إيه اللي عارفة إن فيه مشاكل، أنا مطلقتش وحياتنا مستمرة وممسحتش صورنا مع بعض، ومنزلتش غير صورنا في الفرح، والله العظيم ما مسحت صورنا، أمسحها ليه؟! حياتنا تخصنا مش تخص حد تاني، وبالنسبة لأبي، فقد تصالحت معه قبل وفاته ولم أعلم بوفاته إلا بعد الدفن بيومين".

تعليق زوجها على خلافها مع والدها

وعلق هشام ربيع، زوج الفنانة بوسي، على خلافها مع والدها قائلًا: "حد بيقول إن ربنا غضبان عليها عشان خلافاتها مع والدها، لكن لو الشخص ده تابع هيلاقي إن بوسي بتكلم والدها شبه يومي ومتصالحين قبل العيد الكبير، والدنيا ماشية بخير، لكن لما والدها توفى عرفت بعدها بيومين، في ناس في عائلتها لا يحبونها ولا يتمنون الخير لها".

وأردف: "اتصلت بناس في العائلة وقالت إنها مستعدة لسداد ديون والدها إن وجدت، وأرسلت لوالدها حاجة كبيرة جدا في عيد الأضحى".

يذكر أن العديد من الشائعات انتشرت خلال الأيام الماضية عن انفصال بوسي، وإلغاء متابعة زوجها على “إنستجرام”، وحذف صورهما معًا، بالتزامن مع نشر زوجته الأولى صورا لعقد القران على زوجها.