بعد التعافى من أزمته الصحية.. محمد عبد الرحمن: «أمى دعوتها تعويذة» (فيديو)

تحدث الفنان محمد عبد الرحمن الشهير بـ"توتا"، عن تفاصيل أزمته الصحية الأخيرة وخضوعه لعملية جراحية بالقلب، موضحًا أن دعم الجمهور كان أهم أسباب تعافيه وتخطيه هذه المحنة الصعبة.

وأوضح "عبد الرحمن"، خلال لقائه مع الإعلامية منى الشاذلي في برنامج "معكم منى الشاذلي"، المُذاع على قناة cbc، مساء اليوم الخميس، أن حب الجمهور كان سببا في شفائه.

وقال: "حسيت بكمية حب من الناس أنا مكنتش متخيلها.. لذلك هم مايستحقوش مني أحكيلهم أي حاجة فيها ألم، أنا شوفت كمية حب ودعوات الحمد لله يارب.. بقيت أقول دول كلهم بيحبوني.. نفسيًا ده فرق معايا جدًا.. ده غير دعم الأصدقاء في الوسط.. اللي هما أهل فعلا".

وأوضح "توتا"، أنه بعد الأزمة الصحية قرر تغيير العديد من عاداته، حيث خصص يوميًا وقتًا للمشي، قائلًا: "وقت المشي أصبح مقدسا"، وتابع: "أنا كنت من أعداء المشي، واكتشفت إن المشي ده الرياضة الوحيدة اللي نضحك بيها على جسمنا بسهولة جدا، دلوقت بقي يوميا لازم ساعة إلا ربع مشي.. وطبعا الأكل في الخفيف أنا أصلا بحب المسلوق".

وأكمل: "أنا كان عندي 3 شرايين مسدودة يعني الواحد كان ميت.. فالحمد لله والصحة بالدنيا الحمد لله.. كرم ربنا وحب الناس هم اللي قوّموا الواحد".

كما تحدث محمد عبد الرحمن عن علاقته بوالدته، وأنه يطلب منها الدعاء يوميا، قائلا: "أنا قبل أي شغل لازم أمي تدعيلي.. لازم تدعيلي كل يوم.. في دعوة مشهورة ليها العيال صحابنا مسمينها تعويذة.. بيتريقوا عليا لأن أمي دايما بتدعيلي وتقول (ربنا يجعل في وجهنا ووجهك جوهرة وفي لساننا ولسانك سكرة).. أمي مقدرش أزعلها ربنا يخليهالي".