رسالة من أيمن بهجت قمر لمحمد نجاتي بعد تفكيره في الاعتزال
وجّه الشاعر الغنائي أيمن بهجت قمر رسالة إلى الفنان محمد نجاتي بعد إعلان الأخير تفكيره في الاعتزال عقب انتقاد أحد الكتاب له عبر موقع التواصل الاجتماعي "فيسبوك".
وكتب بهجت قمر عبر حسابه الشخصي بموقع التواصل الاجتماعي فيسبوك قائلًا: "أنا قبل كده هاجمت محمد نجاتي لما غلط في المؤلفين بشكل غير مقصود، لكن كفايه تجريح في الراجل كلنا بنغلط وكله رزق ونصيب".
وأضاف: "نجاتي موهوب وأكيد وقته هييجي، أتمنى من محمد نجاتي ما يتأثرش بأي كلام؛ لأن محدش بيتعمد الإساءة له وبقول له إنت أخ وزميل وليك أعمال مميزه وحصل خير".
وظهر مساء أمس الفنان محمد نجاتي في فيديو له رد فيه على انتقاد أحد الكتاب له، ومقارنته بالنجم أمير كرارة وقال نجاتي في الفيديو: "عاوز أقول إني مكنش ليا دخل في ترشيحي لمسلسل محمود المصري مع أستاذ محمود عبدالعزيز، الترشيح جاء من خلال الدكتور مدحت العدل وهو حي يرزق يُسأل في ده".
أضاف: "أما بقى بالنسبة للبوست اللي اتقال فيه شوف دلوقتي أمير كرارة فين ومحمد نجاتي فين؟ طبعًا أمير كرارة نجم كبير وهو ما وصلش للي فيه دلوقتي إلا نتيجة تعب وجهد وعرق، قدر إنه يوصل لحب الناس وقاعدة كبيرة جدا من الجمهور، لكن دي حاجة مش بإيديا، دي حاجة خارجة عن إرادتي".
وتابع: "أنا راجل ممثل وبشتغل الحاجات اللي بلاقيها كويسة ومناسبة، ممكن تكون مش أعمال بتاخد بروباجاندا كبيرة زي ما فنانين كتير بيشاركوا في أعمال أنا أتمنى أكون في الحاجات المهمة دي، لكن غصب عني أنا مضطر أشتغل حاجات علشان أكمل بقيت حياتي لأن عندي التزامات، وعندي حاجة تخليني مش مبسوط أوي".
واختتم الفيديو قائلًا: "وأحيانًا بضطر أقبل حاجات مش راضي عنها عشان أقدر أكمل حياتي، وإذا كانت الوضعية دي مضايقة ناس أو بعض الصحفيين على فكرة أنا ممكن أعتزل وأريحكم كلكم مني وتبقى نهاية الحكاية".
