سامى مغاورى: سعيد بالمشاركة فى «أحلام سعيدة» و«يسرا» أيقونة نجاح
أعرب الفنان سامي مغاوري، عن سعادته بالمشاركة في مسلسل "أحلام سعيدة" والذي انتهى من تصوير آخر مشاهده خلال الأيام القليلة الماضية.
وقال مغاوري عبر صفحته على فيس بوك: "كل سنة بتمني أشتغل مع بعض الشركات الكبيرة لأنه بيبقي عندها مفردات للنجاح وبتنتقي أعمالها ومخرجيها ونجومها، ومن الشركات الكبيرة اللي أنا بتمني أشتغل دايمًا معاها والحمد لله ربنا بيوفقني كل سنة وبيختاروني شركة العدل جروب، أنا سعيد جدًا إن أنا اشتغلت معاهم السنة ديه وخصوصًا مسلسل أحلام سعيدة لأن بطلة هذا العمل أحد أيقونات النجاح.. النجمة الكبيرة يسرا".
وأضاف: "يسرا ليا أعمال كتير معاها لكن في كل عمل بيبقي في إضافة يمكن المرادي أنا متقابلتش معاها في ولا مشهد لكن وجودنا معاها وإحساسنا كلنا كفنانين وممثلين أنها موجودة معانا في هذا العمل دة بيسعدنا جميعًا، وجود غادة عادل في هذا العمل شيء مهم جدًا، لأن غادة فنانة كبيرة وجميلة ومحبوبة، شيماء سيف نجمة جميلة خفيفة الظل، ومي كساب لينا وقفة عندها لأن مي كساب كانت بنتي في هذا المسلسل وهي ممثلة متمكنة قوية جدًا ملتزمة جدًا جدًا جدًا بتدي للممثل اللي قدامها نوع من الإيجابية والطمأنينة".
وتابع: "كان ليا الشرف أني أشتغل السنة ديه كمان مع كاتبة مهمة جدًا هي الأستاذة هالة خليل، هالة خليل مش مؤلفة دراما عادية إنما هي تملك حسًا وطنيًا وعندها بعد نظر ولها رؤية وبصيرة سياسية واجتماعية واقتصادية وده بينعكس على شغلها ولما الممثل بيكون شغال في إطار واعي يستطيع إنه يطور من أدائه، ويبقى على نفس مستوى وجهة النظر المقدمة في العمل الفني".
واستكمل: "يقود هذا العمل المخرج المايسترو الكبير الفنان عمرو عرفة.. يمكن أول مرة أشتغل في مسلسل مع الاستاذ عمرو عرفة، لكن في الحقيقة وأحب أكد على ده، مهما كان الممثل اللي معاه كبير وصاحب خبرة كان بياخد بإيده ويضيفله ويقدمه بصورة جديدة الناس ماشافتهاش قبل كده وأحب أشكره على ده جدًا".
واختتم: "أنا في الحقيقة مش عايز أنسي حد بس بشكر كل العاملين في هذا المسلسل المتميز "أحلام سعيدة" وعلى رأسهم طبعًا شركة العدل جروب والأستاذ جمال العدل المنتج الواعي قائد هذه الكتيبة الفنية الكبيرة، وربنا يحققلنا كلنا كل أحلامنا وتبقى أحلام سعيدة وكل سنة وأنتم طيبين وكل عام وأنتم بخير".
