محمد المعتصم يكتب: يوميات رمضان (17)

- أغنية "لا يزال السؤال هي ليه قلبت عيال" عملت حتى صباح اليوم حوالي 70 الف مشاهدة.. تقريبا أنا عامل منهم 60 ألفًا.

- الممثل الكوميدي محمد نجم دخل في غيبوبة.. نجم ربنا ينجيه صاحب تجربة مهمة في المسرح نتفق أو نختلف عليها لكنه عمل مسرحا باسمه.. بس للأسف التجربة انتهت والمسرح اتهد.
 
- اللي حصل مع نجم تجربة ودرس لكل النجوم الجدد إنهم ما يركبوش راسهم ولا يفضلوا يراهنوا على إن الجمهور بتاعهم وبييجي علشان خاطرهم.. أكيد مش هتبقوا أهم من محمد نجم، اللي كانت الناس بتنزل من الطيارة على المسرح بتاعه.

- لما شوفت مسرح نجم بيتهد زعلت ولما شوفت مبني بيطلع مكانه زعلت أكتر.. بس لما شوفت محمد نجم وهو واقف على إيد الصنايعية بطلت أعدي من الشارع.

- استخدام لغة الإشارة في مسلسل زلزال تجربة لازم تتعمم على كل المسلسلات والأعمال الدرامية.. الفكرة إنك بتوصل لمشاهدين نفسهم يتابعوا وبتعمل مشاهدة في مناطق تستحق إنك تتشاف فيها.. التحية والتقدير لصاحب الفكرة.
 
- الواد سيد الشحات.. أحمد فهمي عاد الي قواعد الكوميديا سالمًا.
 
- الواد سيد الشحات.. المخرج أحمد الجندي بيثبت إنه واحد من أهم المخرجين اللي بيتعاملوا مع الكوميديا خاصة في توظيف المؤثرات البصرية.

- الواد سيد الشحات مجموعة اسكتشات لطيفة مش مسلسل بالمعني المعروف، لكن في رأيي أنها من أهم الأعمال في رمضان وفريق الكتابة عبقري.
 
- فكرة إنك ترمي إيفيهات على مسلسلات مشاركة معاك في الموسم الرمضاني وتطلع شخصيات منها معاك، الفمرة اتلعبت قبل كده وأشهر حاجة منها كانت ظهور أحمد فهمي في مسلسل الوصية مع أكرم حسني لما كرر مشهد ظهور أحمد السقا في مسلسل رحيم مع ياسر جلال.. فهمي كرر الموضوع السنة دي وقلش على مسلسل " هوجان" لمحمد عادل إمام.
 
- فكرة إنك بتكتب وتصور ع الهوا دي محتاجة مؤلفين " مقطعين البطاقة" وده موجود مع فهمي ومخرج فاهم وعنده مساعدين محترفين، وده موجود مع فهمي.. يبقى فهمي يعمل اللي هو عايزة.
 
- محمد عبد الرحمن "توتا" أحد أهم مسببات البهجة في رمضان السنة دي.
 
- النهاردة أول عرض رسمي في الشرق الأوسط لفيلم "على بابا " بطولة ويل سميث ومينا مسعود.. مينا ممثل مصري اختارته الشركة العالمية لدور البطولة بعد اختبار 2000 ممثل شاب.. اللطيف في الموضوع إن بي بي سي لما سألت مينا عن الدور فقال إنه استلهم الكوميديا في الدور من عادل إمام.. سامعين من عادل إمام.

- الفنانة المغربية "دنيا بطمة"، النهاردة اكتشفت ان موسوعة "ويكيبيديا"الرقمية، وصفتها بـ"العاهرة"، هي زعلت طبعا وجمهورها اتضايق وحصلت خناقات وتقطيع هدوم على السوشيال ميديا.. للأسف النسخة العربي من ويكبيديا متاح لأي حد يعمل أي شيء فيها ويعدل في أي تفاصيل منها مهما كانت.. وأعتقد أن دنيا لو أخدت نفس وهديت ودخلت على اعدادات الصفحة كان ممكن تغير المكتوب وتخلي نفسها رئيس أمريكا.. وكانت هتمشى عادي.
 
- دور رشوان في "ولد الغلابة" الذي قدمه الممثل عماد زيادة نقلة مهمة في مشواره الفني.. هو كان بيتعامل مع التمثيل بمنطق الهواة أو بمعني أدق كأنه رايح يسلم على أصحابه في اللوكيشن ويدخل معاهم الكادر، شخصية رشوان كشفت أن عماد ممثل وعنده إمكانيات.
- هاني رمزي كان جايب أحمد شيبة في هاني في الألغام ورامز جلال كان معاه حلا شيحة في رامز تحت الشلال.
 
- في نفس التوقيت اللي كانت مذيعة برنامج رامز بتشرح فيه جمال بالي وإندونيسيا وأنها رخيصة والحياة زبادي خلاط كانت المظاهرات في إندونيسيا ولعت والضرب بقى للركب.

- بغض النظر عن حضن الغوريلات اللي اخدته حلا من رامز واللي هيجنن "اللي عايزين اختهم حلا" أكتر ما هم مجانين.. حلا مبهجة.

الأرصاد حذرت الطقس وقالت إن الأربعاء شديد الحرارة والخميس اشد.. اليوم جربنا إحساس الدجاجة في الماء المغلي.. غدًا الخميس ستجرب إحساس الدجاجة نفسها، ولكن بعد وضعها على الفحم.
 
- وفق تقرير شركة نايت فرانك العالمية للاستشارات العقارية مصر تمتلك ثاني أكبر عدد من الفنادق "الكبري" في إفريقيا أما شركة الأبحاث العالمية "Research And Markets"، فقالت إن مصر هى أكبر سوق في عدد الفنادق "الفاخرة" في الشرق الأوسط وإفريقيا.. ورغم أن الفروق مش واضحة قوي بين الفنادق "الكبرى" و"الفاخرة" إلا الخلاصة وحسب التقارير الرسمية القاهرة تمتلك وحدها حوالي 721 فندقًا، ده بخلاف 1171 فندقًا موزعة بين إسكندرية وشرم والغردقة وأماكن تانية.. ده طبعا بخلاف القرى السياحية.. مصر تمتلك كل الحاجات دي وماجد المصري في مسلسل زلزال يسيب ده كله ويعمل فرح بنته في الفندق نفسه اللي شغال فيه محمد رمضان، لا ويتفاجئ إنه هو اللي بيقدم لهم العصير.. عبط إحنا يا عصام.

دعاء اليوم: اللهم لا تحرمنا من النظر إلي من ظلمونا وأنت تقتص لنا منهم.