يوميات رمضان "13"

- أمينة خليل في مسلسل "قابيل" عاملة دور برد مش دور تمثيل.. حاجة في منتهى الفصلان
- حرق محمد ممدوح في مسلسل (ولد الغلابة) قضى على التوهان اللي عملته إم بي سي للمشاهدين بعد الفطار.. اللي يبدأه ممدوح بعد أذان المغرب كتاجر مخدرات ومع أذان العشاء ربنا بيكرمه ويبقى ضابط.
- إعلان بيبسي دون المستوى.. كنا مستنيين حاجة أفظع على مستوى ميسي وصلاح، طلع حاجة ع الضيق وعاملينها في البيت.
- إعلان بيبسي بيقول إن ما ينفعش في وسط سيزون زي رمضان شركة كبيرة تنزل إعلاناتها في أي مكان بعيد عن التليفزون.. وإن التليفزيون له هيبته.
- إعلان بيبسي واضح فيه إننا كبرنا لدرجة إن بيومي فؤاد وعلاء مرسي وأحمد سعيد عبد الغني بقم نوستالجيا.
- إعلان بيبسي كتب نهاية النوستالجيا في إعلانات رمضان.. ويخلي المعنيين تتأكد إن طبق بيض بالبسطرمة هياكل مع الناس أكتر منها -النوستالجيا يعني- في رمضان الجاي
- من سنتين كانت سارة سلامة مولعة رمضان ومصر كلها بتتكلم عنها وعن الهوت شورت اللي بتلبسه.. زي ماراحت موضة سارة سلامة هتروح موضة ياسمين صبري مع الأخذ في الاعتبار أن ياسمين لو ركزت في التمثيل هيجيي منها.
- لو فيه مقاييس حقيقية للمشاهدة ماسبيرو زمان هتطلع ضمن الـ٣ الأوائل.
- برنامج عمرو عبد الحميد وجيهان خليل علي قناة ten تجربة حلوة للأسف ما أخدتش فرصتها من الشو لأنه ما اتكلمش عن البطانة ولا الطحال.
- أغنية (لا يزال السؤال.. هي ليه قلبت عيال) من أعظم الأغاني في موسم رمضان.
- صحيح الكوميديا السنة دي خسرت كتير بغياب أكرم حسني.. لكن ادينا عرفنا قيمته مقارنة ببقية الكومديانات.
- ظهور أكرم حسني في مسلسل الواد سيد الشحات منحه قبلة الحياة ونقلة من خانة "محاولة ضحك ممنهجة" إلى مسلسل كوميدي.
- هو الصاحب له عند صاحبه إيه غير إنه يطلع معاه يسنده في مسلسله ويضحك له الجمهور؟!
- هنا الزاهد هتعمل حاجة من اتنين في أحمد فهمي.. يا إما هيمشى ع العجين ما يلخبطوش أو هيبطل تمثيل.
- بالمناسبة أبو جبل من أفضل المسلسلات حتى الآن ومصطفى شعبان مفاجأة للناس اللي كانت فاكراه بيتجوز بس في الدراما.
- العرض التاني لمسلسل "لمس أكتاف" هيحقق نجاح افضل.. للأسف مش واخد فرصته بسبب حالة الزهق اللي صابت الناس من الدراما السنة دي.
- إيقاع مسلسل زلزال وقع.. وأخباره اختفت من متابعات الناس اليومية.. هيرجع تاني في آخر شهر رمضان لما محمد رمضان يزهق م الدنيا اللي مطلعه عينه ويقرر يطلع عين كل اللي في المسلسل.
- فيه قطاع كبير بيروح الأندية بعد الفطار علشان تمارين الأولاد.. الملاحظ أن معظم الأندية بتشغل إم بي سي ولو فيه مباراة بتذيعها.. مافيش فأنت بتسمع إم بي سي بالأمر وممنوع تتفرج على أي قناة مصرية.
- ما تنسوش تتبرعوا لمستشفى ابو الريش وأي مستشفي للأورام
دعاء اليوم: "اللهم اجعل كيدهم في نحورهم واجعل أقدامنا أعلى من كرامتهم"


نشوفكم بكرة لو فيه نصيب