بالصور.. استعدادات ضخمة لحفل كاريوكى بكايرو فيستفال
يستعد فريق كايروكي، لإحياء حفل غنائي كامل العدد اليوم الجمعة، والمقرر إقامته في كايرو فيستيفال سيتي مول بمنطقة التجمع الخامس، وأجرى المطرب أمير عيد البروفات الخاصة بحفله مساء أمس بصحبة فرقته.
وقال أمير عيد مطرب فريق كايروكى: «احنا عاملين مجموعة من الأغانى الجديدة، وهتكون بتوزيع مختلف، وعاملين أفكار كتيرة حلوة هتعجب الناس لأن اللى يهمنا إنهم يكونوا مبسوطين».
وأشار تامر هاشم "درامز الفريق" إلى أن تذاكر الحفل مباعة بالكامل، ويوجد أكثر من 5 آلاف تذكرة مباعة من الحفلات السابقة قبل تأجيلها وهيدخلوا بيها تانى، ورد فعل الجمهور ده أسعدنا جميعا، وغرسوا فينا إصرار اننا نعمل حاجات افضل تعجبهم فى حفل كايرو فيستيفال سيتى مول.
واستكمل شريف هوارى "عازف جيتار الفريق": «احنا اللى يهمنا مستوى المزيكا اللى بنلعبها وهتكون الحفلة دى فيها تغيير لأنواع المزيكا اللى بنقدمها، خاصة فى توزيعها بشكل كامل وحتى ترتيبها كى لا تكون تقليدية، لأن هدفنا إن الناس تفضل فاكرة الحفلة دى ولا تمر مرور الكرام».
وأعرب أمير عيد عن سعادته بعد معرفته، بعدم إعادة التذاكر المباعة من قبل فى حفلاتهم المؤجلة، لدرجة أنهم قالوا حتى لو هتفضل ذكرى معاهم، وعشان كده بحب أكون متواصل معاهم، وهنفرحهم أكتر فى الألبوم الجديد كمان.
وعن المنافسة بين فرق الأندر جراوند، قال تامر هاشم، التطور رهيب فى كل المجالات حتى من الناحية الفنية وكل شخص يلعب المزيكا بشكل مختلف والسوق بقى مش معتمد على مطرب فقط زى زمان، الموضوع بقى فرق أكتر، وأصبحت ناجحة بشكل ملحوظ.
ووجه أمير عيد رسالة لجمهوره، قائلا: انتوا بالنسبة لى حاجة كبيرة وبحس انكم معرفة وأصدقائى، وبستمتع لما بكون معاكم واغنى الكلام اللى بحب أغنيه معاكم، واكيد مستنيكوا فى كايرو فيستيفال سيتى مول.
