يوميات رمضان (12)

- إعلان (الحمد لله مش عربيتي) من أسخف الإعلانات وأسوأها لكنه إعلان بيكشف جزء مهم من تركيبة المجتمع.. يعني لو في زيطة وأطفال بتتخانق هتلاقي نفسك بتتطمن الأول وتقول (الحمد لله مش ابني اللي اتعور) لو بتصلي الجمعة ودخل حرامي جزم وسمعت الدوشة هتروح تتطمن على جزمتك وتقول (الحمد لله مش جزمتي اللي اتسرقت) لو فيه شوية هوا وتراب والهدوم المنشورة اتبهدلت هتقولي (الحمد لله حاجتي ما باظتش) ولو المكوجي جايب الهدوم واتزحلق منه كام حاجة (فالحمد لله مش بنطلوني الجديد)
قيس على ده كتير.
- اعلان (الحمد لله مش عربيتي) سخيف جدا لكنه مش غريب.. ده شبه المجتمع.. أو على رأي المثل (دود المش منه فيه).
- مستشفى بهية عاملة إعلان شيك قوي لدرجة إنك بتتنح قصاده.. ربنا يشفي كل مريضة.
- أغنية كارمن سليمان في إعلان بهية من أجمل الأغاني اللي عن الأم اللي ممكن تسمعها.
- إعلان مستشفى بهية درس في الإعلان لازم يتعلمه اللي عمل إعلان مستشفى أهل مصر في إنه يخدم فكرته ويوصل للجمهور.
- وجود المستشار الجليل عدلي منصور في إعلان مستشفى ٥٠٠٥٠٠ منحها شهادة ضمان.
- اكتشفت ان برنامج هاني رمزي لسه بيتذاع ودي كانت مفاجأة بالنسبة لي.. كنت فاكره رجع الفلوس اللي خدها مع جواب اعتذار.
- إم بي سي مازالت بتحتفل بعادل إمام.. لا دي بتقسم في الاحتفال وكأنها بتطلع لنا لسانها.
- الحسنة الأهم في تأخر عرض (شقة فيصل) هو مشاهدة المرحوم وائل نور ادعوله بالرحمة.
- شقة فيصل لو أتصور السنة دي كان هيبقي مختلف من حيث الصورة وأفكار الإخراج والمؤلف محمد صلاح العزب كان هيعدل فيه.
- فيه ممثل جامد اسمه محمد محمود حتى الآن ماحدش عارف يستغل موهبته.. بس ظهوره في مشاهد شقة فيصل من الحاجات الحلوة
- من الناس اللي بفتقدها السنة دي أحمد وفيق.. أحمد ممثل مرعب وجوده في أي عمل يخليك واثق فيه.
- "ولد الغلابة".. مشهد مواجهة السقا وإنجي المقدم ومي عمر والغفير حلو قوي.
- مش عارف ليه ضباط المباحث وأشرف مصيلحي تحديدا فضلوا ساكتين في مشهد المواجهة.. تحس إنهم واخدين أوردر م المخرج ما يقاطعوش البطل.
- الضابط اللي كان بيحقق مع مي عمر كان قاعد على كرسي ومكتب تحس انه قاعد في لجنة ومستني ورق الأسئلة تتوزع.
- مي عمر اتخانقت مع السقا في التحقيق وشدوا مع بعض وزعقوا لبعض.. وأول ما خرجوا من قسم الشرطة وقفوا يتكلموا مع بعض عادي ويشرح لها إن الغفير طلع زكي قوي وهي بتشكي إنها خايفة تروح البيت وعايزة تسافر مصر.
- ما تنسوش مستشفى ابو الريش في تبرعاتكم وزكاة رمضان.
- إعلان شريك المراسم هو أسوأ حاجة حصلت بعد دخول محمد فؤاد مجال التمثيل.
- وقعة نور قدري من فوق الكوبري في برنامج رامز في الشلال أهم حاجة حصلت في مشوارها الفني من ٧ سنين.
- من كتر ما بسمع إعلان دايس وبشوف الناس بتتجاوب معاه بقيت حاسس إن الناس بتغنيه علشان تغيظ مدحت شلبي
- دعاء اليوم: "اللهم لا تشمت فينا نفسا شبعت من بعد جوع ولا تحكم فينا قلبا لم يعرف الرحمة".
اشوفكم بكرة...