إنجى أنور: إبراهيم عادل ذنبه فى رقبة مسئولى بيراميدز

قالت الإعلامية إنجي أنور، "النهاردة اكتملت القوة الضاربة لمنتخب مصر بانضمام اللعيبة المحترفة وبدأنا الاستعداد الحقيقي لماتش كاب فيردي يوم الجمعة الجاية اللي هيقام في ستاد القاهرة وبعده ماتش بتسوانا اللي هيتلعب يوم 10 سبتمبر، وكل دعمنا للفريق القومي الجهاز الفني واللعيبة عشان يرفعوا اسم مصر.. بس عندي كام ملحوظة للكابتن حسام حسن أولا يا كابتن فيه لعيبة عندك محتاجة معاملة نفسية من الطراز الأول في التوقيت ده وأولهم إبراهيم عادل اللي وصل للمنتخب وهو مدمر نفسيًا بعد ما فشلت صفقة انتقاله للدوري الإسباني، وذنبه في رقبة مسؤولين بيراميدز".

وأضافت إنجي، خلال برنامجها "مصر جديدة"، المذاع على قناة ETC: "أن نقطة تانية لازم الكابتن حسام حسن يركز فيها وهى مسالة اللياقة البدنية للاعبي المنتخب المحليين خلي بالك إن أغلبهم كانوا في إجازة يعني راجعين وفي أضعف أوقات لياقتهم البدنية فخلي بالك اللعيبة مش هتقدر تكمل ماتش كامل فلازم تعتمد على المحترفين أكتر من لعيبة الدوري المصري وانت هتلاعب كاب فيردي وده منتخب أغلب لعيبته محترفين في أوروبا اللي الدوريات بتاعتهم شغالة بقالها شهر فخلي بالك يا كابتن حسام من فخ اللياقة البدنية وانت أكيد شوفت ماتشنا مع كاب فيردي في أ مم افريقيا اللي فاتت وشفت إزاي لياقتهم كانت أعلى مننا وقت ما لعيبتنا كانوا في منتهى الجاهزية امال دلوقتي نقول ايه".

وأوضحت إنجي، قائلة: "أنا متأكدة إن عزيمة وإخلاص رجالة منتخبنا الوطني هتقدر إنها تحقق الفوز، وإن شاء الله بعد نهاية التوقف الدولي هيكون رصيدنا 6 نقاط من الماتشين بتوع كاب فيردي وبتسوانا".