ريهام السهلى: العلمين الجديدة.. قصة نجاح لمصر

أعربت الإعلامية ريهام السهلى، رئيس قناة «DMC»، عن سعادتها البالغة بإعمار مدينة العلمين الجديدة، لافتة إلى أن هذا الإنجاز بمثابة قصة نجاح.

وتابعت: «مكان زى ده مينفعش يكون غير مستغل، فكرة إنه يتعمر ويبقى فيه سكن وفرص للشغل وسياحة ومهرجان العلمين، ويبقى فيه سياح وضيوف يشوفوا بلدنا جميلة، خسارة إنها كانت غير مستغلة».

وأردفت: «فرحانة ومبهورة بالعلمين الجديدة والإنجاز اللى اتحقق هنا فى وقت قصير جدًا، الإنجاز موجود طول السنة، لكن المهرجان ساعد ولفت النظر للنقطة الرائعة دى لبلدنا وللإنجاز اللى هو قصة نجاح كبيرة فى العلمين».

وقالت «السهلى»، خلال لقائها ببرنامج «صباح العلمين» الذى يقدمه الإعلامى إبراهيم عبدالجواد، إن ما لفت نظرها بزيارتها مدينة العلمين هو أن المدينة شهدت إعمارًا سريعًا فى فترة قصيرة، فضلًا عن وجود أبراج مميزة بجانب البحر الجميل. وأكدت ريهام السهلى أن المهرجان يسوق لمدينة العلمين الجديدة بشكل غير مباشر، معقبة: «بنشوف ده أكتر من خلال شغلنا، الناس مستمتعة فى المهرجان، سواء الحفلات أو الفعاليات الرياضية وجولات المسئولين، وزيارات ضيوف مصر الكبار».

وأضافت «المكان رائع ويستحق إنه يتشاف من غير ما نقول تعالى زور العلمين، المكان بيتكلم عن نفسه والمهرجان ساعد إن ده يحصل والناس تشوف العلمين قد إيه مكان خلاب بجد جذب العديد من السائحين».

وتابعت: «إحنا بنتفسح وإحنا بنشتغل، والبحر فى العلمين لا يقارن بأى مكان، سواء لونه أو دفئه أو رمله أو شطه، هنا بجد حاجة تانية، البحر فى الساحل الشمالى والعلمين حاجة جميلة». وعن الحفلات والفعاليات التى حضرتها بمهرجان العلمين، قالت: «حضرت حفلة التسعينيات، ده طبيعى لأن دى أغانينا إحنا، ولها ذكريات حلوة ولذيذة عندنا، واستمتعت بالحفلة جدًا، وأغانى فنانيها بسيطة ولطيفة، وهُما طبيعيين ونجوم قريبين من القلب».

وقالت إن مدينة العلمين الجديدة جرى إنشاؤها لتستوعب العديد من الفئات التى ترغب فى الإقامة بها طوال العام، حيث توفر جميع سبل المعيشة، معقبة: «مدينة معمولة عشان يتعاش فيها طول السنة، وده متوافر بالفعل».

وأضافت أن توفير سبل المعيشة فى العلمين الجديدة من شأنه تشغيل المدينة طوال العام، مردفة: «متوافر بالعلمين مدرسة يقدر الشخص يودى أولاده، ويكون عنده شغل يقوم به، ويكون فيه مستشفى ورعاية طبية، ووسائل مواصلات تنقله لأى مكان، سواء قريب أو بعيد».

وعبرت ريهام السهلى عن إعجابها بتخصيص شاطئ بالمجان فى العلمين الجديدة، متابعة: «فكرة هايلة وجديدة وجيدة، والدولة لما بتقوم بمشروع قومى كبير زى العلمين مينفعش يبقى لناس وناس لأ، وبالتالى فيه شاطئ مجانى للى عاوز يستمتع ببلده ويشوف المشروع العملاق».

وأكدت أن «هذا الأمر يندرج تحت فكرة الدولة المتحضرة التى تراعى كل مواطن بها وتعمل حسابه وفاكراه وشايفاه ومش نسياه».