كتبها قبل شهرين.. 10 وصايا للفنان تامر ضيائى قبل رحيله
رحل عن عالمنا مساء اليوم الأربعاء، الفنان تامر ضيائي بعد صراع طويل مع المرض.
وكشف "ضيائي" عن تفاصيل وصيته قبل رحيله بشهرين، في منشور له عبر حسابه على موقع التواصل الاجتماعي فيس بوك.
وصايا الفنان تامر ضيائي قبل رحيله
وكتب تامر ضائي في شهر مايو الماضي، في وصيته: "بوست وصيتي ده هيفضل باين على صفحتي لحد ما أموت.. الحقيقة اللى كلنا عارفينها ومتأكدين منها إننا كلنا ربنا كتبلنا إننا نموت فى ميعاد محدد غير معروف، وعشان كده كتبت الكلام ده لأنى محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة، ووقتها طبعًا مش هعرف أقولها لحد".
وجاءت وصية الفنان الراحل تامر ضيائي كالتالي:
- صلاة الجنازة أهم من العزاء وهى اللى كل ما العدد زاد كل ما ثوابى كان أكتر، فأرجوكم تصلوا عليا.
- مش شرط تيجى العزاء ويا ريت لو اتعمل فى البيت أو مكان بسيط وبفلوسه تطلعولى صدقة جارية أفضل.
- من فضلكم لم يثبت أو يتفق عليه عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش وادعولى الوقت اللى هتقروا فيه جزء فضوا نفسكم واقعدوا ادعوا فيه.
- بلاش صدقة جارية تقليدية وسهلهة ومش مستفاد بيها يعنى المصاحف كتير فى مصر أوى وكل بيت فيه كتير، فممكن نحط الفلوس فى جامع بيتبنى أو كرسى متحرك فى مستشفى يستفادوا بيه المرضى أو دخول مياه لبيت غلابة أو بناء سقف لبيوت فقراء، حاجات ناس تستفيد بيها لمدة طويلة.
- دى نقطة مهمة أوى بالنسبة ليا.. محدش يقول لحد بتعيط عليه ليه، ومتعيطش عشان هو بيتعذب! الكلام ده غلط، سيبوهم يعيطوا لحد ما يطلعوا كل الشعور اللى عندهم ومفيش حاجة بتقول إن العياط معناه عدم رضا بقضاء ربنا "وابيضّت عيناه من الحزن فهو كظيم".
- أهم حاجة تانى هى الدعاء وبس والصدقة.
- من فضلكم تكثفوا الدعاء وقت نزولي القبر وتتصدقوا بأى حاجة بنية إن ربنا يجعل قبرى روضة من رياض الجنة ويثبتنى عند السؤال لأن ده أهم وقت ليا ويا ريت كمان بعد ما تدفنونى تقعدوا معايا شوية ومتستعجلوش تمشوا عشان تونسونى فى ليلة زى دى.
- الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوه على نفسكم بالدعاء ليا عشان أبقى فى سعادة لحد ما أقابلكم تانى.
- اللي بيحبوني يدعولى كتير عشان لو مفيش حد يدعيلى.
- ودى مهمة أوى أوى أوى عاوز الكل يسامحني علي أي حاجة عملتها فيه بقصد أو بدون قصد "اللهم إن كثر موت الفجأة من حولي وكثر موت الشباب غفلة، فيا رب إن كنت أنا القادم فأحسن خاتمتي وارزقني نطق الشهادة عند الموت ويسّر طلوع روحي وهوّن عليّ سكراتي، فإني أحب أن أرحل في هدوء وسكينة وطمأنينة، ولا تقبض روحي إلا وأنت راضٍ عني لكي أكون عبدًا مقبولًا عندك حتى أليق بلقائك العظيم وإن كان لي من العمر باقٍ فاغفر لي ذنوبي ومعاصي نفسي الأمّارة بالسوء واعفُ عني وامحُ لي كل ما يعرقل طريقي إليك وردّني إليك ردًّا جميلًا يا رب العالمين".
