مواقف كوميدية حصلت مع النجم فتوح أحمد فى بداياته

كشف الفنان فتوح أحم، عن مواقف كوميدية حدثت له في بداياته، قائلا: "إنه على الرغم من أنه كان الأول على الجامعة في التمثيل، ورغم بداياته التمثيل في سن صغيرة، إلا أنه رسب في السنة الأولى له بمعهد الفنون المسرحية". 

وأضاف فتوح أحمد، خلال لقائه ببرنامج و"احد من الناس" المذاع عبر فضائية الحياة الذي يقدمه الإعلامي عمرو الليثي، أنه عندما ذهب هو والفنان صلاح عبدالله للامتحان في معهد الفنون المسرحية، رسبا هما الاثنان، معقبًا: "صلاح عبدالله انكسر نفسيًا، وأنا دخلت الجيش، وقولتله أنا هخلص جيش وأروح الكويت، أشتغل محاسب، وأدرس في معهد الكويت، وكنت مصمم أكمل". 

وتابع: "السنة اللي سقطنا فيها، كنا عاملين مشاهد جيدة جدًا، لكننا برغم ذلك رسبنا، لكن السنة اللي كنت رايح أهزر فيها، عديت على صاحبي اسمه عماد وأنا رايح الجيش، قولتله تعالى نشوف الامتحان إمتى في المعهد، لما روحت أشوف الامتحان لقيته النهاردة وأنا رقم 5، ورقم 1 دخل، جريت على شئون الطلبة عشان أعمل تأجيل، لكن مفيش تأجيل، ورجعت تاني لشئون الطلبة، قولتله لو مش هتأجلي أنا عايز الفلوس، كنت دافع 6 جنيهات ونصف، قالي فلوس إيه امشي، قولتله فلوسي إن شاء الله هتجيبوا بها دوا لعنيكم، هاتلي الورق، قالي امشي الورق بعد ما النتيجة تطلع".

وأردف: "ببص للجنة اللي اسمي فيها، لقيت الله يرحمه كرم مطاوع، كمال ياسين، شاكر عبداللطيف، الدكتور فوزي فهمي، وعماد صاحبي قالي هتعمل إيه قولتله الفلوس بتاعتي راحت وهدخل أشوف الناس دي وأتكلم معاهم بفلوسي، دخلت لهم ومثلت، وانتهيت وخرجت، وبعدها وأنا ماشي مسافر صاحب ليا قابلني وفاجئني إني اتقبلت في المعهد".