لأول مرة.. السباح «الباروكي» يستعد لعبور قناة السويس بين إفريقيا وآسيا

أعلنت هيئة قناة السويس، عن تنظيم فعالية بالتعاون مع وزارة الشباب والرياضة، والاتحاد المصري للغوص والإنقاذ فعالية رياضية خاصة للسباحة في قناة السويس الجديدة بالتزامن مع احتفالات نصر أكتوبر العظيم.

وتشمل الفعالية قيام السباح الدولى سيد الباروكي بالسباحة في قناة السويس الجديدة تمهيدا لتسجيل المحاولة ضمن موسوعة جينيس للأرقام القياسية كأول سباح يعبر القناة الجديدة بزعانف المونو وأول سباح يعبر بين قارتين آسيا وأفريقيا، وذلك يوم الثلاثاء القادم الموافق ٥ أكتوبر. 

ويعقب ذلك مؤتمر صحفي بنادي الشاطئ بالإسماعيلية في تمام الساعة الواحدة ظهرا، بحضور كوكبة من الشخصيات العامة الرياضية والفنية والإعلامية، وذلك تحت رعاية الفريق أسامة ربيع رئيس هيئة قناة السويس.

وقال باروكى عبر صفحته الخاصة بموقع التواصل الاجتماعى فيس بوك: اللحظة اللى بستناها من زمان، الحلم اللى عشته فى تدريب وتركيز، دلوقتى خلاص هنبدأ أول خطوة فى تنفيذه، بدعمكم وبحبكم هنغير مع بعض التاريخ، هنجيب العالم كله لمصر، وزى ما أبطالنا عملوها زمان وخلوا العالم كله يحلف بالجندى والمقاتل المصرى بعد معجزة عبور القناة فى حرب أكتوبر 73، هنخلى العالم كله يرجع يبص تانى ويعترف تانى بقوة الإرادة والتحدى اللى عند المصريين.

وأضاف: زى ما كانت أنظار العالم كله على قناة السويس فى حرب العبور سنة 73، إن شاء الله هتكون كل عيون العالم على قناة السويس فى 6 أكتوبر اللى جاي، وإحنا بنحقق انجاز جديد وتحدى جديد بعبور قناة السويس الجديدة، سباحة بزعانف المانو، عشان يكون التحدى أكبر ويكون الإنجاز ده بيحصل لأول مرة وأقدر أحقق لبلدى اللى حلمت بيها من زمان، انى دائما أرفع علمها فى كل مكان، ليه يكون تاريخ السباحة قائم على تحدى عبور المانش فى إنجلترا، ليه ما نخلقش مانش جديد ونحط مصر على خريطة السباحة فى العالم، يوم 6 أكتوبر اللى جاى تحدى جديد هدخله بروح انتصار اكتوبر وبدعمكم كلكم ، يوم عبور قناة السويس".