الطيار «أبواليسر»: «القضية شغّالة حتى لو محمد رمضان اتحبس» (فيديو)
علَّق أشرف أبواليسر، الطيار الذي تسبب الفنان محمد رمضان في إيقافه عن العمل مدى الحياة، على حكم محكمة جنح الدقي في الجيزة بحبس رمضان سنة ودفع كفالة 10 آلاف جنيه، وغرامة 20 ألف جنيه.
وقال أبواليسر، المعروف إعلامياً بـ«الطيار الموقوف»، في حديثٍ مع مراسل «الدستور» تامر مجدي، عبر بث مباشر على صفحتها الرسمية على «فيسبوك»: «الموضوع برمته في يد القضاء، لمدة 5 شهور بنحاول نحل الموضوع لذلك اضطريت أرجع الموضوع بكامله للقضاء، ويقوم القضاء بالحكم فيه».
وأضاف: «أمس كان فيه أول حكم بأول قضية وهو حبس وغرامة، ولسّه فيه قضيتين يوم 6 أغسطس»، مشيرًا إلى أن القضيتين رفع فيهما التعويض إلى 25 مليون جنيه.
وتابع: «ومش أنا اللي طلبت ده كلام المحامين، وأنا بوجه العتاب للفنان محمد رمضان بقوله غير إنك قفلت بيوت كتير إنت كمان حرمتني من ثلاث سنوات ونص في ممارسة العمل».
وأردف: «محمد رمضان معرضش عليّا أي مبلغ مالي نهائيًا، ومكلمنيش لحد النهارده، إنما هو بيعمل شو إعلامي، وقال في البرنامج إنه جابلي شغل في الإمارات وأنا اللي موافقتش، لكن الكلام ده محصلش، وإزاي تبقى اتسحبت رخصتي من مصر وأروح أسوق في الإمارات».
وأكمل: «لو محمد رمضان قرر يتصالح ده موضوع تاني، النهارده الموضوع ده فات عليه سنة، وهو فين طول السنة دي حتى لو بكلمة تجبر الخاطر».
واستطرد: «مع احترامي الشديد لمبادرة جريدة (الدستور) للصلح إنما اللقاء مش هيكون لقاء بيني وبين الفنان محمد رمضان، وإنما هيكون لقاء محامين، وإذا كنت اتنازلت في مرة ورحتله مكتبه مش هعملها تاني، لكن ممكن في مكان محايد يحضره المحامين، وأنا سايب الموضوع للقضاء ولو عايز يحل الموضوع ودي يقعد مع المحامين بتوعي ويتفاهموا، ومما لاشك فيه أن محمد رمضان له جمهوره وله بعض الناس اللي مش متفهمه للقضية صح فهتكون في صفه».
واختتم الطيار أشرف أبواليسر حديثه قائلًا: «القضية شغالة حتى نهايتها، حتى لو تم حبس محمد رمضان».
