رئيس مجلسى الإدارة والتحرير
محمد الباز
رئيس مجلسى الإدارة والتحرير
محمد الباز

هو ممكن يوم تعودى!!

جريدة الدستور


ليه عيونك كات بتهرب من عيونى..
تنتعش لوعة ظنونى وتناوشنى أحلى بسمة مستحية
ليه عتابك ويا جرحك بيعاتبنى
كنت ببعتلك رسايل شوق ولهفة متدارية
شفتينى يومها ارتبكتى وانشغلتى بالغموض المصطنع
وإنت قلبك ممتنع عن إنه يرجع فى التفاصيل اللى تاهت فى دهاليز الغضب..
مش هاعتبك ع اللى راح من عمر بينا..
بس محتاج إنى أشوفك نجمه بتضوى فى طريقى..
قمرة فوق سطح الليالى الواخدة منى أحلى ذكرى
أرسمك شمس الخيال اللى بتخايل فؤادى..
اللى بتعزز مواقفى فى الظروف الصعبة جدًا
فى النجاحات الفريدة..
كنت بأحلم تبقى جنبى وإحنا بنخطى الطريق..
واحنا بنعدى م النهار ده لبكرة أحلى..
سبتنى ورميتى حديثنا الطويل المنتشى..
واللى مليان بالغنا والذكريات
جوة بير ملهوش قرار..
حس قلبى بارتعاشة خوف ونشوى
لما كنتى عليا قاسية..
لما كانت صدمتك قسمانى قسمة..
آه يا نسمة كانت بتنعش روح وجودى..
هو ممكن يوم تعودى؟..
تبعتى وردة فى بريدى.. وقتها كان يبقى عيدى
وقتها كان يهدى قلبى..
والهدى يبقى طريقى.