يوميات رمضان (11)

- (كل سنة وعادل إمام بخير وسعادة)
- لو اللي في دماغي طلع صح ومحمد ممدوح طلع وقع في المية وهيقوم بعد شوية ويكمل "ولد الغلابة" مع السقا هزعل قوي من أيمن سلامة ومحمد سامي.
- مخرج ومؤلف ولد الغلابة مطالبين بوضع تفسير منطقي لقصة كسر نضارة احمد السقا.. السقا ظهر بيها وهي مكسورة ومتربطة.. وقلنا عادي.. لكن يدخل خناقة وضرب ويدغدغ محمد ممدوح.. وممدوح يدغدغ فيه والنضارة ما تتكسرش.. لا دي ما اتحركتش أساسا من على عينه.. كدة يبقى اللي كسرها استخدم الـF16 ولازم نعرف القصة.
- نضارات مغربي لو استغلت نضارة السقا وعملت اعلان وقالت فيه (نضارة ما بتتكسرش) هتعمل مبيعات رهيبة.
- مؤلف ولد الغلابة تعامل مع الصعيدي بشكل نمطي وتقليدي في التخلص من الفلاشات اللي عليها الأدلة اللي ضده والفيديوهات.. فقرر يمشي بالليل ويبص يمين وشمال ويتاويها في الترعة.
- (عادل امام ظاهرة فنية لا تتكرر.. عادل واحد من أهم رموز القوى الناعمة المصرية.. كل لحظة وانت طيب يا زعيم).
- في الحلقات الأولي من زلزال، كان تأثير عبد الرحيم كمال واضحا على محمد رمضان.. للأسف التأثير ده خلص.
- احتفال إم بي سي بعادل إمام مبهج ويفرح الملايين اللي بيحبوا الزعيم.. كل لحظة وعادل إمام بخير وبصحة وسعادة.
- (عادل إمام يستحق تكريم من مصر..كرموه)
- لاعتبارات كتيرة بحاول ما انتقدش البرامج خاصة وإن فيه زملاء وأصدقاء شغالين فيها أو للأمانة مجبرين - علشان لقمة العيش - يشتغلوا فيها.. بس بصراحة مش قادر.. فيه برامج تفطر.. وفيه مذيعين يخرجوا م الملة.. وفيه "عايشة شو" اللي مش لاقي له توصيف.
- عايشة شو في أول سؤال لصابر الرباعي منحته لقب أمير الطرب العربي.. وبكدة يبقى عندنا أمير الغناء العربي هاني شاكر اللي أخد اللقب بعد سنين طويله من الغنا وأمير الطرب العربي - صوته عظيم بالمناسبة - اللي أخد اللقب لأن عايشة ما عرفتش تقول إيه في تقديمة الحلقة فمنحته اللقب.
- أول سؤال لصابر الرباعي من عايشة قالت له فيها مبروك أعمالك الجديدة.. إيه حكاية الكليب اللي هيشاركك فيه الجمهور.. اللي هو أساسا عبور لاند بتعمل إعلانات عنه من شهرين
- عايشة سألت صابر الرباعي سؤال لوزعي قالت فيه: ايه اهم محطة في حياتك.. في حياة كل شخص فيه نقطة تحول ممكن يكون شخص أغنية لقاء.. فيه نقطة تحول في حياة كل فنان" آه والمصحف كل ده سؤال!!
صابر حاول يجاوب بتوسع وياخد راحته فقال: لا هي مش نقطة هي أكثر من نقطة و..
هنا عايشة قطعت كلامه وقالت بحسم: بس فيه نقطة
بصراحة صابر الرباعي كان هتجيله نقطة
- حتى الآن مش قادر أستوعب ايه اللي قالته عايشة لأمير كرارة.. الراجل راح لها البرنامج وفاكر انه برنامج بجد.. مذيعة واستوديو وأسئلة بجمهور ففوجئ بيها بتسأله: "انت بتنزل صور على انستجرام والناس حطوا كومنتات إيه الحكاية؟".
أمير كرارة ما استوعبش.. فضل متنح ثواني مستني السؤال فاكتشف إن اللي فات ده هو السؤال، فضحك كده وجاوب: "بنزل صور عادية زي الناس بس ما بطلبش من حد يعمل كومنتات ولا لايكات".
هو قال كده علشان ما يحرجهاش بس عايشة كان عندها إصرار إنها تكمل من منطلق لا يابابا مش أنا اللي يهرب مني الضيف في إجابة سؤال، فقررت ترمي الكبيرة وهي بتتك ع السين وقالت بحزم: بس بتنزلها؟ قالها: آه.. فردت عايشة بمنتهى ثقة الجاهل: بتنزلها ليه؟ علشان الناس تحط لايكات وكومنتات.. هنا تحس إن فيه قطع في التصوير يعني ممكن سليم الأنصاري يكون جابها من شعرها.
الغريب إن الهبل ده ما اتشالش في المونتاج.. وبصراحة المخرج معذور لانه لو قرر يعملها.. البرنامج هيصفصف ع التيتر.
- اللي يشوف عايشة شو تهون عليه منى الشاذلي.
- انت متخيل رد فعل واحد زي محمود حميدة لو استضافته عايشة شو خاصة لو كان لسه صاحي م النوم!
- الدرس المستفاد من برامج ومسلسلات رمضان إنك لو هتتجوز أو هتصاحب اتأكد الأول إن الهانم موهوبة علشان ما تجيبلهاش الشتيمة.
- تاني الدروس المستفادة من رمضان إنك لو متجوز أو مصاحب بلاش تنتج لها برنامج أو مسلسل إديها قرشين تصرف على نفسها أو هات لها دهب.. الستات بتحب الدهب.. أو بتمن البرنامج إعملها مشروع في الساحل.. هترزق وهتديعلك وإحنا كجمهور هندعيلك.
- كل حلقة من مسلسل علي ربيع بيخسر فيها كتير.. أكتر من خسارة مصطفى خاطر.
- كدة طلعنا من "مسرح مصر" بكريم عفيفي ممثل، ومحمد عبد الرحمن كوميديان.. وجبرت كدة.
- لو على ربيع ما اخدش باله من نفسه.. سنتين وهيختفي.
- دار الإفتاء أصدرت اليوم فتوى رسمية عن جواز استخدام الشطافة في رمضان.. وده طبعا ردا على كلام قاله أحد الأشخاص وواضح والله أعلم انه استخدم الشطافة غلط فقرر إنها بتفطر.
- ( كل سنة وانت طيب يا أستاذ عادل )
دعاء اليوم: "اللهم اجعل حرارة الجو تحرق كل "العصافير"

نشوفكم بكرة