من غير ورق

كتر التعود كسر العكاز
من حكة الأرض بأعرف الشارع
غميت عيونى حضنت ضهر الناس
فرغت من جيبى الحساب بالجبر
بأعرف أكلم كل شىء ساكن
لكن بأحب بدون ما كفى تلين
خبيت حنينى القلب شاط منى
كل اللى ينده روحه تتشعبط
أنا اسمى فاكر ولا بأتلخبط
قالوا العبيط أهو جااااااى
رديت أنا أعبط
من قبل ما أتخبط ح أكون فاتح
إوعاك تشاور عينى تطرفها
الحبل لسه فى صرتى موصول
بأمسح فى عرقى وأفرق المحصول
من غير ورق ولا شكوى لظروفها
كل العيال بتحبنى لله
من غير مِلبِّس أو لمصروفها
بأعرج عشان الكل يسبقنى
وأبرى فى صباعى وبأكتب العنوان
وبألقن الصاحى إزاى يعدى وفين
وإن كان معاى قرشين بيشخللوا للضيق
وأنا مش ولى ولا بأحرس الصناديق
وبأصب بالإبريق لو حد إتعفر
وأنفخ فى عين الوقت لما الحكم صفر
وبأخاصم المفتى لو إتكى وكفر
وأستنى ع الباب بالفطار ع الريق.