أيمن بهجت قمر عن أزمة أغنية "النفسية": "القانون بينا"
طرح الفنان محمد حمزة مؤخرًا أغنية بعنوان "النفسية محتاجة" من كلمات محمد القاياتي، وألحان حمزة، وتوزيع هاني يعقوب، ومن إنتاج شركة "MG Productoin"، ثم قام المطرب محمد الشرنوبي بطرح أغنية مشابهة بعنوان "النفسية"، وهي كلمات الشاعر أيمن بهجت قمر وألحان محمد يحيى، الأمر الذي خلق أزمة بين صنّاع الأغنيتين.
وعلق "قمر" على تلك الأزمة، قائلًا: «أنا الحمد لله مش محتاج بعد العمر ده أني اتخانق مع حد وأدخل في نزاع على أخر الزمن على أغنية ده شئ ما حصلش معايا في بداياتي فأكيد يعني مش المفروض إنه يحصل بعد 27 سنة تعبت فيهم وبنيت اسم وسمعة الحمد لله مش هزكي نفسي.. أنا كتبت الأغنية دي من حوالي 3 سنين وعملناها أنا ومحمد يحيى لمحمد الشرنوبي من فترة طويلة سنة ونص وأكتر والكلام أترخص في الرقابة باسمي في أول مارس وكل شئ كان تمام لحد ما لقيت من كام يوم مطرب شاب والله والله عمري ما كلمته ولا أعرفه شخصيًا ومش زي ما هو ماشي يقول».
وتابع: «المهم لما لقيت الاسم والفكرة والمحتوى كله متشابه من البرومو ولقيت لوجو صوت الدلتا قلت بلاش أعمل بلبلة للولد مع الشركة، كلمت ملحن شاب صاحبه انا أعرفه وبلغته أن فيه أغنية لمحمد الشرنوبي وكده حرام وخصوصًا أن صاحبه قالي فعلا إحنا عرفنا من وقت مهرجان الجونة أن فيه أغنية معمولة شبهها قلت له طيب الأغنيه دي بفكرتها متسجلة باسمي في المصنفات الفنيى يبقى الحل نعمل زي الناس المحترمين يا تغيروا الكلام يا نلجأ لجهة تحكم بيني وبينهم وهي جهاز الرقابة على المصنفات الفنية».
وأضاف: «الملحن بلغني أنه مش عارف يحل ومش طرف في الموضوع عكس اللي عرفته بعد كده طبعًا.. المهم قلت له كده أنا هضطر أكلم حد في صوت الدلتا وفعلا كلمت الأستاذ حمادة إسماعيل والراجل مشكورًا رفع البوستات والبروموهات لأن مش منطقي أسيب فكرتي مشاع وتتحرق ولما تنزل يقولوا أني واخدها من حد تاني وعشان المطرب الشاب ما يتظلمش ويدفع تمن النزاع قلت لحمادة إسماعيل وهو موجود يقدر يشهد على كلامي برغم أني مش ملزم بالمرى أني مستعد أهدي الولد أغنية ومايحرقش الغنوة بتاعة الشرنوبي وبلغت صديق المطرب الملحن الشاب وقاللي هبلغهم وفجأه جريوا سبقوا ونزلوا الأغنية قبلنا بيوم والمطرب ماشي يقول في المواقع أني كلمته وعرضت عليه أغنية وهو رفض».
واستكمل "قمر"، حديثه: «حقيقي مهزلة وأسلوب رخيص ومافهوش أدنى أنواع الاحترام لفرق الخبرة والسن وللزمالة وشغالين كمان حسبي الله ونعم الوكيل وآيات قرأنية ودعا علينا وكأن محمد الشرنوبي ده برضه مش مطرب في بداية حياته ومحتاج برضه الفرصة دي والغريبة أنهم منزلين بوست بيسخروا مني فيه وبيتكلموا بمنتهى عدم الاحترام وبيبرروا أن جملة "النفسية محتاجة" دي ملك الناس ومش حكر على حد طبعًا ده كلام من واحد تافه معندوش أي فكرة وجاهل طب ما الكلام كله ملك الناس! وأي حاجه بنكتبها الناس بتقولها! وهو ده أساس نجاح الشاعر اللي بيلقط الكلمة أو اللحظة ويحولها لأغنيه ومادام اتسجلت بإسمي بعنوانها وبفكرتها ومحتواها يبقى خلاص حتى لو توارد خواطر ما ينفعش غير لو هما معاهم ورق يحفظ حقهم بترخيص الكلام قبلي.. يعني أنا أألف قصة وتنزل فيلم تيجي حضرتك تألف زيها وتقوللي ما أنا معرفش وتوارد خواطر والأفكار مش حكر على حد».
واختتم حديثه، قائلًا: «كفاية استهزاء بحقوق الناس كفاية عدم احترام لتاريخ الناس كفاية كل ما تتزنق تحولها لصراع أجيال مع شخص هو هو نفسه اللي لحد أسبوع فات بتلجأله وقت ما بتحتاج لضهر ليك وكان أجدع واحد في الدنيا وقت ما كانت جدعنته ماشية مع مصلحتك.. عمومًا بينا القانون ومش عشان حاجة هاخدها من وراكوا مثلا لكن عشان زي ما كنت واحد من اللي علموكوا أزاي تدوروا على حقوقكوا هعلمكوا برضه أزاي ما تعتدوش على حقوق الناس ونفسي طويل ويمهل ولا يهمل».
