ماجدة الرومي تترك عزاء والدتها من أجل ملحم بركات

وجهت الفنانة اللبنانية ماجدة الرومي، رسالة للفنان الراحل ملحم بركات، الذي رحل عن عالمنا قبل يومين وتم تشييع جثمانه اليوم إلى مثواه الأخير في قرية كفرشيما.

ماجدة الرومي، قالت في رسالتها: "من عَزا أمي للعَزا فيك ومن دير القرقفي كفرشيما لكنيسة مار بطرس وبولس كفرشيما، قطعت المسافة بضيعتنا الصغيرة وأنا قلبي عم يعصرو الأسى وأنا عم بسمع صوتك طالع من كل شارع وحي".

وأضافت: "صوتك نفسو نفسو يا ملحم يلي فرّحني العمر كلّو مبارح نفسو نفسو ما ترك بعينييّ دمعة وحدة إبْكِيها، وهي نفسها نفسها شوارع كفرشيما يا ملحم يلي تمشّينا عليها بضيعتنا صغار وزهّرتلنا صغار وضحكتلنا صغار وهديتنا كل ربيع وكل أمل هي نفسها نفسها مبارح شفتها خريف حزين مستعد يرمي كل وراقو ويبكي معنا ويكتب معنا ع صفحة تشرين الأول ٢٠١٦ "كلّو رايح وج الله بس وحدو اللي باقي".
وتابعت: "شفت الدنيا حزينة عليك مثلنا وبتحبّك مثلنا ورح تشتقلك مثلنا وتقول لكل جيل جايي بعدنا إنك من أعظم الأصوات يلي مرقت على هالشرق إنك صوت إذا رَق بيبكّي الحجر وإذا جن بتنحِنيلو العاصفة وإذا تجلّى بتِخْضَر فينا جَنّات وانك جملة لحنية متفوّقة عريقة رح تبقى درس بالاصالة لكل عاشق موسيقى اليوم وكل يوم ولتنتهي الأيام".

وأنهت رسالتها قائلة: "أبو مجد يا حبيب اللبنانيي وكل العرب يا ابن كفرشيما البار مهما بعّدتنا الأيام رح نرجع نلتقى هيدا إيماننا بالله، وحتى نلتقي لنغني للأبد أمجاد الرب، بسألك بمحبّة طالعة من نص قلبي تِقبَل منّي بهاليوم الحزين كتير، تقديري العظيم لفنك الأصيل لصوتك العالمي ولكل يلي كنتو بهالحياة".

يذكر أن والدة ماجدة الرومي، رحلت عن عالمنا قبل أيام قليلة بعد صراع طويل مع المرض.